AIA嘉年華「攤位遊戲攻略」

author: Timable, 17 Dec 2015 (Thu) 4:54pm


一年一度AIA嘉年華又嚟啦!好多人都覺得貴,因為玩樣樣嘢都要俾錢,想玩最刺激個幾款機動遊戲,真係要成百蚊先玩到一次~ 但點解仲係咁多人會去呢?AIA比起香港主題樂園,又真係帶到多D新鮮感俾大家,起碼有未玩過嘅機動遊戲,好似今年咁,新増咗唔少小朋友同老人家都玩得嘅遊戲,去一次都無妨,又可以感受下歐陸嘉年華氣氛!當然攤位遊戲係另一吸引點啦(因為D公仔),今年認真靚好多~ 機動遊戲就唔多講啦,等小編簡單介紹下攤位遊戲啦!


碌木保齡球
難度: ★★
獎品: 大眼仔/毛毛公仔
玩法: 有4次機會,碌到木保齡球瞓低晒就有獎。一次全倒就有特獎,兩次就有大獎,如此類推。亦都可以玩兩次,兩次細獎就換到大獎。
心得: 小編比較大力,一次就可以碌低3-4個。瞄準一嘢碌埋去,拎獎其實唔難。


碌乒乓波
難度: ★★★★
獎品: Peppa Pig
玩法: 有四粒碌乒乓波,要碌落去指定分數位,6分起就有獎。
心得: 塊底唔係平嫁,所以3號位好難中,要斜斜地碌!可以考慮主攻1同2分位~


圈玻璃樽
難度: ★★★★★
獎品: 北極熊/熊貓大公仔
玩法: 每次有一桶圈圈,圈中一個即有大獎。(嘩,成桶咁多,好難唔中喎!Sorry我真係諗多咗)
心得: ,真係好鬼難!唔知有咩技巧,小編摸唔透,大家可以去碰下運氣~


掉積木方塊
難度: ★★★
獎品: 得意熊bearbear
玩法: 每次4個波,要將四舊積木都推出晒塊木板。一球中晒就大獎、兩球二獎如此類推。
心得: 無乜技巧可言,你眼界好加埋快狠準一定有獎(不過可能要試多一兩次)!


碌重力球
難度: ★★★
獎品: 白色熊bearbear
玩法: 每個窿都有特定分數,分別為5、10、20、50、100,每次有4球機會,令膠球停留係越高分嘅窿越好,160分起就有獎。
心得: 要適當控制力量,唔好太大力!


掉顏色杯
難度: ★★★
獎品: 胡迪/巴斯光年
玩法: 有5個波波俾你掉,中紅色就細獎、綠色中獎、藍色特獎(得兩個窿)。
心得: 掉出去實唔中,我彈出場外~輕輕力由下向上拋,等波波係杯上面彈入~

攝/文: Alice