而家喺香港做後生仔壓力幾大! 細個考試要攞12A又要學非洲鼓珠心算,終於挨到大個咗諗住搵番個女朋友,點知人哋又要同你講「Package」。我哋呢啲凡夫俗子究竟點先可以搵到真命天子(女)呢?諗諗吓,摩梭族嘅走婚制度好似幾啱我哋!喺母系社會下,男女嘅結合都係講心唔講金,最緊要啱feel,鍾意幾時一齊就一齊,完全無結婚呢回事。就算有咗BB都主要由女方家族照顧,嘩聽落好似係港男恩物!但係舞台劇《走婚》嘅男主角鄧健泓體會過呢種愛情後又唔係咁贊同喎!佢話受過愛情嘅傷害,都係一夫一妻最實際!睇吓佢點解釋?

「走婚」喺香港適唔適合?
鄧:
完全唔適合!主要係因為兩方面。第一,香港人嘅性格貪新鮮又善忘,而且貪心,對於愛情嚟講都好危險,尤其女性會好蝕底。例如一個摩梭女仔嚟到香港,隨時會俾人飛,俾人傷害。第二,社會壓力。因為香港本來就係一夫一妻制,你突然有幾個男朋友女朋友,會受到好多社會壓力。

有冇試過介入多角戀?
鄧:
細個嗰時有試過!女方同一時間搵前男友,又搵其他異性曖昧(真係當自己走婚咁喎)。但我相信因果報應,當你搵第二個嗰時,對方亦會搵番另一個。更多嘅大話只會令關係更猜忌,而一段關係有咁多人嘅話,大家嘅妒忌心又愈嚟愈強,最後都會一拍兩散!我試過傷害人,轉過頭俾最愛傷害番(聽落咁像MK活地亞倫嘅電影哲學),知道都係一心一意對女朋友最實際(所以而家搵到真命天女好開心?Patrick立即甜笑),搵到個啱嘅就要好好去愛!


你點睇講心唔講金嘅愛情?睇Package係咪太現實?
鄧:
我覺得每個人有自己需要,隨年紀同經歷更清楚自己想要乜。咁本住自己嘅需求去擇偶係理所當然嘅,就好像所謂嘅「Package」咁。有啲人鍾意錢,可能因為佢身世問題。好似一個人貪靚、鍾意長頭髮咁,無話啱唔啱,所以都係唔好judge呢件事,都係各取所需咁啦!你唔覺得只有讀書時期先會有純純的愛,唔講條件咩?所以我好鼓勵讀書時期拍吓拖!(笑)


你係《走婚》入面嘅角色係點?
鄧:
我係劇入面做一個player,可以愛同性分開,所以佢對愛情好「大方」,唔介意各有各玩。但係佢最終都係想搵到個愛佢,貼貼服服嘅女友。我覺得呢個角色一日唔改花心一日都係會得唔到佢想得到嘅野,因為「己所不欲,勿施於人」,你點對人,人點對你,有乜理由你自己玩完人哋仲會對你專一吖。


同多年兒童節目拍檔魯文傑(Simon)做情敵有咩感覺?
鄧:
Simon其實係我前輩!我好欣賞佢。佢份人好好笑,令我經常同佢做野都忍唔住笑。但演戲就好認真,我哋要爭女仔。佢演得對愛情好投入,好執著,產生咗唔少新嘅火花。

Patrick仲話 睇完《走婚》嘅劇本,更加覺得一心一意嘅可貴。咁又係,佢本身同女朋友咁sweet,仲出錢出力為女友出碟,緊係唔會再buy「走婚」呢類「不負責任」嘅愛情啦!細個睇佢同魯文傑都係《閃電傳真機》嘅大哥哥,第一次見佢地演對手演仲要係情敵!好期待到時睇佢地「成人」嘅一面! (I mean成熟!)

訪/文:Chanley Chan
攝/編:黑莓


《走婚》 iStage製作 (重演)
http://timable.com/event/848003