無印良品超簡約小屋 港幣20幾萬就買到?

作者: Timable, 2017年4月25日 (二) 下午1時40分


無印良品嘅產品出咗名夠簡約就係人都知,最近日本無印就撈過界,推出「無印良品小屋」(Muji Hut)計劃,積極向家居設計發展!而成品亦都終於面世喇!睇落真心高質喎!


貫徹返一向簡約作風,無印以「在鄉村小屋中生活」為概念,喺日本千葉縣白濱校舍進駐推行第一波實體屋。可以瞓喺大草原上面,一起身打開門就係對住個海嘅感覺…我哋呢啲上唔到樓嘅廢青,都係唔會明㗎喇,嗚嗚!


雖然屋仔細細,但係就五臟俱全,應有嘅傢俬都有齊。屋身使用100%國產杉木木製成,仲用上日本傳統技術建成,絕對唔使驚係豆腐渣工程。聽講無印仲打算喺嚟緊秋天公佈其他嘅進駐地點添!


睇返個價錢,一間無印小屋要300萬yen,計返其實即係港紙20萬多啲。呢個價喺香港都唔知買唔買到一格地板……嗯……冇咩事小T都係出返去睇下幾時有平機票去日本先喇。上樓?咩嚟㗎??

資料來源:Muji Japan
http://www.muji.com/jp/mujihut/