《拾伍年開光大典》艾粒-專訪阿奴阿占

作者: Timable, 4月25日 (二) 下午4時31分

事隔一年,艾粒再次合體開騷,仲話咁快宣佈爆滿要加開兩場!問到點解今次個騷叫做《開光大典》,阿奴就抵死咁答:「阿占之前搵咗個大師,咁個大師就贈咗佢個字:開!」阿占續說:「既然佢畀咗個開字我哋,咁我哋就喺度諗:開咩好呢?開光好似幾好喎。」阿奴解釋:「開光呢兩個字其實係好香港,開咗光就好似畀到新嘅生命力畀大家,咁我哋艾粒一直都係將歡樂帶畀觀眾,所以就揀咗開光大典做個騷名喇。」聽講到時艾粒仲會喺現場即席拎啲神水同觀眾開光,大家可以密切期待下!


艾粒仔咁多年嚟試過扮演唔同角色,由初出道嘅巨型假髮,去到近期嘅韓風路線,佢哋都完全carry到有餘。問到點解今次會係做神仙,佢哋就咁樣樣答:「神仙路線好似冇人做過,既然我哋都扮過咁多嘢咪試下囉。」不過當小T問到如果佢哋真係有機會做真﹒神仙嘅話會想做咩神,佢哋居然異口同聲答:「咸神!」喂呢啲是咪叫做默契十足呀?

創作新角色 要向前看
每次艾粒開騷都會推出一首主題曲,而今次首新歌就叫做《無人完美》,MV入面仲出現咗好多以前嘅角色,好似娜娜奈奈、阿叮阿雄等等。咁係咪即係暗示今次個騷可能會出現呢啲復刻人物呀?「暫時冇諗到呢一步。好多人都問我哋會唔會玩返以前啲嘢,應該就唔會喇,玩過啦嘛!」咁咪冇得重遇Dicky仔囉,嗚嗚。

眾多經典角色 最愛係…?
阿占說:「其實扮得都鍾意嘅,不過近期我最鍾意就係喺ViuTV黑料理節目入面一個叫做J蟹嘅角色,因為我唔使再扮女人,可以做返男人,仲要係一個好瘋狂嘅男人。」睇嚟阿占心底裡都好渴望做返一個真正嘅男人!而阿奴亦都話佢近期最鍾意嘅角色係一個大隻佬喎:「因為我哋最近幫《銀河守護隊2》電影拍咗條宣傳片,我要扮戲入面嗰個光頭大隻佬,用低成本嚟cos呢個角色,都幾好玩。」

各自修行定同枱食飯?
「合體有兩個腦一齊運作,當然會多咗好多idea。而且零壓力,做得好兩個一齊揹,做得唔好就賴對方。但係自己solo開騷,無論係好定唔好都要自己一個揹晒。」話雖如此,阿奴覺得其實有時都應該要分開下:「自己出去搵到啲好玩嘅嘢先可以同拍檔分享㗎嘛!我自己都幾enjoy之前搞嘅個人show,可以做到平時冇機會做嘅嘢,係一個新嘅自己。」阿占:「各有開心同唔開心啦,一個時段合體,一個時段又分返開,我覺得呢個拼盤係最好。做死一樣嘢好悶㗎嘛~」


15年嚟嘅相處之道
「我哋嘅相處之道咪就係唔相處囉!」阿奴霸氣地說。「兩個人易夾啲嘅,放咗工就唔搵對方㗎喇!」咁即係剩係會傾公事?「我唔方便講咁多喇!」咦咦睇嚟長壽組合唔係咁易做呀下…小T都係唔方便講咁多,55。

未來幻想合作對象
艾粒同do姐無論係電台定電視節目都合作無間,擦出唔少火花。問到佢哋將來仲有冇想合作嘅對象,阿占個答案竟然係…「同到do姐合作已經係一件好瘋狂嘅事,下次再合作可能要搵影帝林家棟喇。」阿奴就話想同喺香港出世嘅外國人合作:「有啲南亞裔同印度朋友,佢哋喺香港出世,反而可能比我哋更加了解香港,我覺得都幾有趣。」

重新推出改詞歌?
艾粒初出道嘅改詞歌可稱為佢哋嘅代表作之一,就算去到而家,唱K嗰陣都總會有啲朋友點嚟唱。但問到佢哋會唔會再出改詞歌嘅時候,佢哋竟然話可一不可再呀!阿占話:「而家好易畀人鬧㗎!陣間改咗隻歌出嚟畀人無限上綱,咁就慘喇。」阿奴說:「都會照改嘅,唔出得街啫…」睇嚟以後想聽到佢哋出新改詞歌都係無望喇,鳴!

艾粒電視台重現無望?
小T相信好多人都期待佢哋會拍返艾粒電視台,但阿占就話冇打算推出新一輯呀!「其實艾粒電視台已經化身咗喺ViuTV黑料理呢個節目入面,都有啲趣劇㗎!不過如果你問我哋會唔會拍返艾粒電視台,咁我諗你哋都係睇返舊嗰幾套算喇。因為出新一輯dvd要錢,我哋未籌到旗呀!」佢仲呼籲大家唔好睇咁多艾粒電視台:「睇咁多會影響個腦㗎!Move on啦大家!」

創作一個角色形容80後90後
艾粒「扮嘢」咁叻,叫佢哋創作一個角色去形容而家8、90後,又會係點嘅呢?「我會放好多電子科技嘢喺身上面」阿占說,「而家咩都講智能,成身都係high tec嘢㗎嘛!」而阿奴就話會創作一個好快嘅人:「無論係80後定90後,生活喺呢個資訊發達嘅年代,你啲手指要郁得快,眼又要睇得快。最慘就係連瞓覺都好快醒吖嘛!」小T呢個90後表示完全講中晒,尤其是瞓覺!

介紹返,其實小T讀書嗰陣都係艾粒粉絲嚟㗎!所以今次訪問都問咗好多私心問題(想睇更多可以上Timable Facebook:http://www.facebook.com/timable.hk/)諗返起當初鍾意佢哋嘅原因就係因為睇得開心,帶咗好多歡樂畀我。一個搞笑組合可以喺香港咁多年其實唔容易,希望艾粒呢條搞笑之路可以一直行落去。


艾粒《拾伍年開光大典》on Timable:
http://timable.com/event/1414602

相關事件

(檢視全部)

艾粒《拾伍年開光大典》

update: 7/4/2017 又再爆爆爆!艾粒宣佈加開5月19日同5月23日兩場! update: 30/3/2017 宣佈加開5月20日...

艾粒《拾伍年開光大典》
音樂 @ 麥花臣場館
5月19日-23日 下午8時15分 (2小時)

黎瑞恩 紅館演唱會 2018

Update (22/11/2017): 小恩子喺FB Live宣佈咗日期喇~ 有說小恩子2018年4月會喺紅館開演唱會,計落自...

黎瑞恩 紅館演唱會 2018
音樂 @ 香港體育館 (紅館)
2018年4月5日-6日 下午8時15分 (3小時)

《聽搖滾的北京猿人》前進進戲劇工作坊

──Noosphere,一個精神互通的場域,進化的下一步,由物質層面轉向精神層面。 人類在生物層...

《聽搖滾的北京猿人》前進進戲劇工作坊
藝術 @ 牛棚藝術村 7號 前進進牛棚劇場
12月13日-18日 下午8時 (2小時)

《三城誌》香港舞蹈團

港台韓交流舞台《三城誌》現正公開發售! 這是一個連結生活 土地的傳統舞蹈祭,三城故事由...

《三城誌》香港舞蹈團
藝術 @ 葵青劇院 演藝廳
2018年2月2日-4日

上一篇網誌

4月25日, Timable
無印良品嘅產品出咗名夠簡約就係人都知,最近日本無印就撈過界,推出「無印良品小屋」(Muji Hut)計劃,積極向家居設計發展!而

下一篇網誌

5月2日, Timable
「世上只有媽媽好,有媽的孩子像個寶~~」雖然孝順老母呢家嘢就唔應該係母親節先嚟做,不過都可以帶老母去啲特別嘅地方,食下
留言

關於    歷史    聯絡    iOS, Android    條款    活動籌辦    伙伴    版權所有 © Timable Limited 保留一切權利