Be our guest♫ 英國推出《美女與野獸》雜貨超夢幻!

作者: Timable, 7月10日 (一) 下午12時47分

前排一套《美女與野獸》電影,令到妹豬們發夢都想變成貝兒~又係嘅,入面啲戲服咁靚,又有俊俏嘅王子,仲有茶煲太太等得意到爆嘅精靈幫自己,女小T都表示很想要呀!而家機會嚟喇,英國連鎖店Primark嚟緊會推出《美女與野獸》主題嘅生活雜貨,性價比仲要超高添!


有冇諗過,真係可以用茶煲太太嚟沖茶,再用佢個仔嚟飲茶?聽落好似好殘忍添......其實女小T係講緊呢個茶煲太太茶具套裝呀!阿仔盛惠5元英磅、茶煲太太就賣10元英磅,就算買齊一套都係15元英磅,即港幣150元度,以呢個質素嚟講一啲都唔算貴~


令茶煲太太Fans見到會尖叫嘅product仲有呢個錢罌!用佢嚟儲錢肯肯定會儲得快啲呀!就算當擺設咁放喺度都一樣咁靚㗎~呢個盛惠8元英磅~即係80蚊港紙度!


床上用品方面就預計8月中開始推出,其中毛氈同咕𠱸都係賣6元英磅,即係60蚊港紙,勁抵!而床單就仲未公佈價錢,不過照其他產品定價嚟睇,價錢應該都唔會太貴嘅~


另一個同樣坐擁巨大粉絲群嘅角色-葛士華Cogsworth鐘亦都有喺呢個系列入面亮相!冇錯,佢嘅產品就係……一個鐘!直情好似喺套戲入面走出嚟咁,好搞笑呀!而呢個鐘都只係賣6元英磅,性價比超高!


最後就係呢個玫瑰花水杯~造工超精緻,只需要5元英磅咋!拎返公司用夠晒方便,仲肯定會引嚟唔少艷羡目光添~如果嚟緊有朋友仔去開英國,記住tag佢哋幫幫手喇,哈哈!


資料來源:Primark
http://www.primark.com/en/features/home/2017/june/disney-fans-be-our-guest

上一篇網誌

7月7日, Timable
i.t 將會喺希慎廣場6樓全層開旗艦店,入面有齊晒美妝護膚、生活小物、特式家品同飲食品牌,等你衣食住行都可以keep住潮!當中嘅STY

下一篇網誌

7月13日, Timable
實力天后劉美君一向低調,對年輕一輩來講,較深印象的應該就是幾年之前主持電視節目《超級巨聲》,當中不乏天后級示範。其實由
留言

關於    歷史    聯絡    iOS, Android    條款    活動籌辦    伙伴    版權所有 © Timable Limited 保留一切權利