【實現公主夢!】迪士尼公主系列婚紗登場!

作者: Timable, 2017年9月4日 (一) 下午1時16分

有邊個女仔唔想做公主,同白馬王子拉埋天窗丫?尤其是結婚行禮嗰陣,個個女仔都想自己做「童話中的主角」~如果可以著上迪士尼公主禮服,咁就更加完美喇!最近日本頂級婚紗品牌KURAUDIA就同迪士尼推出聯乘設計,等咁多位「公主」可以美夢成真呀!


呢個系列有齊灰姑娘、白雪公主、貝兒、睡美人、人魚公主、長髮公主等6款嘅禮服畀你揀,連布料都跟足動畫設計,務求忠於原著!



灰姑娘一身淺藍色嘅禮服夠晒典雅,配埋玻璃鞋就100%神還原喇;至於白雪公主嘅鮮紅色禮服亦都非常搶眼~至於女小T大推嘅就係貝兒禮服!完全同動畫設計一模一樣,著上身即刻想唱返句:"Once upon a time..."呀!而新郎哥亦都可以著上野獸禮服,襯埋一set㗎~




伴娘裙方面亦都唔執輸,襯返公主style㗎!約埋成班姊妹一齊著,呃like度一定爆燈呀!



聽講日本方面11月就會推出呢個公主系列婚紗,有興趣嘅朋友不妨留意下~
資料來源:http://www.kuraudia.holdings/mikaninagawa/