《小井胡同》復出江湖 萬梓良︰以演出報答40年恩師

作者: Timable, 10月27日 (五) 下午12時48分


當年憑電影《賭俠大戰拉斯維加斯》 一句「阻人XX要燒XX」被網民不斷回帶嘅萬梓良(萬子哥)最近重出江湖,今次Peter朱唔使出火,演出King Sir(鍾景輝)新作舞台劇《小井胡同》依然老馬有火!訪問尾聲,萬子哥更加應小T邀請,即席重現精彩銀幕金句,你又記得幾多呢?

新人獲提拔做主角 香港舞台首位爆粗

萬子哥喺大銀幕同公仔箱嘅演出為人熟悉,但唔講唔知,原來萬子哥喺成名之前已經演出過唔少舞台劇,更是劇界首位爆粗的演員!萬子哥憶述77年參加麗的第二期藝員訓練班之後,得到King Sir提拔,78年起邊拍劇邊參演舞台劇,例如喺《清宮怨》等劇中實習。King Sir喺79年導演、翻譯嘅著名舞台劇《馬Equus》首度公演,萬子哥就首次擔大旗演出男主角Alan Strang一角。呢齣劇畀到佢唔少啟發,例如劇中經典一幕馬房love scene中,女主角為藝術犧牲,脫掉上衣淨係戴Bra演出,喺70年代算係非常大膽。萬子哥嘅角色Alan學識唔高、無文化,劇本原著更加粗口橫飛,經King Sir大幅刪節後仍然避唔到,萬子哥話作為新人,初踏台板已經要講粗口,笑言自己可能係香港舞台劇爆粗第一人!

拍完劇趕排戲 著清裝地鐵歎飯盒

當年萬子哥舞台劇、電視劇、電影多棲發展,有咩趣事?萬子哥回憶排戲時期正值麗的《大內群英》拍攝,晚晚要偷3個鐘到金鐘兵房排戲,當時萬子哥飾演雍正,一身清裝打扮,剃髮留辮、水衫、長靴,揸住飯盒、夾住劇本,除咗皇袍,廣播道跑落樂富站過海,當年未知地鐵唔可以食嘢,一身奇裝異服喺地鐵開餐,唔講途人仲以為佢「穿越」定cosplay。萬子哥都話好懷念年青、體力充沛嘅時代!雖然之後以電視劇、電影演出為主,演出方法有所差異︰電影同電視劇講求運鏡,演員表現方式要有調動,太浮誇容易「over」;情緒就以舞台劇最難,要好飽滿、突出,正正畀到演員生涯好好嘅磨煉。


報答恩師多年提攜 主演《小井胡同》刻劃人性

萬子哥之後雖然淡出舞台劇界,但一直對舞台劇非常著迷,今次應邀回到最初的起點,擔任《小井胡同》男主角。《小井胡同》描寫由新中國成立,跨越大躍進、文化大革命至打倒四人幫30年間,北京巷弄間的時代變遷、百姓生活轉變,以及小人物的命運。萬子哥飾演工人,係「工農工農,工人促進生產,係社會上嘅老大哥!」萬子哥表示戲裡嘅場景北京胡同,喺戲外因為城市發展早已被拆遷,但劇本描述人對生存嘅追求、人性嘅醜陋、和善、仁愛,一直唔會變。

萬子哥今次重出江湖,原因無他,為咗報答伯樂King sir 多年裁培。今年適逢理工大學80周年,亦係King Sir 80歲生日,萬子哥好榮幸能參演呢齣重頭戲。萬子哥今年60歲,20歲做演員,跟住恩師40年,對佢當然非常尊敬。萬子哥最欣賞恩師超過半世紀以來裁培學生、推廣戲劇不遺餘力, 希望佢身體健康,繼續做佢終身最開心的事──戲劇。

萬子哥坦言近年被血糖高、糖尿病纏身,體力、記性都大不如前,電影電視演出大為減產,不過對舞台劇著迷嘅佢,一直希望回到台板上面,希望身體仍可應付嘅時候,盡力演出,做一場好戲畀大家睇。今次劇作係理大80周年重頭戲,萬子哥同唔少充滿熱情嘅學生,仲有舞台劇好手陳淑儀、李楓、覃恩美等,大部分都係首次合作,雖然訪問時King Sir仲未開台位,但已經叫戲癮發作嘅萬子哥大呼期待!

萬子哥經典金句 你又記得幾多?

《小井胡同》將於11月尾至12月上旬,喺理工大學賽馬會綜藝館連演七場。如果到場年輕觀眾入場,掛住低頭撳電話,點算?萬子哥有以下霸氣外露嘅回應︰

“Remember! You disturb me acting! Your Wi-Fi pocket will be barbecued!“

最後萬子哥有咩同大家講?

「《小井胡同》買咗飛未呀?買得一場?!買一場點夠呀?So what? 買多幾場?Okay?」

文: Jade Chung

相關事件

(檢視全部)

《小井胡同》香港戲劇協會

香港理工大學、香港戲劇協會攜手呈獻 香港理工大學八十周年校慶活動暨理大劇團創團演出 ...

《小井胡同》香港戲劇協會
藝術 @ 香港理工大學 賽馬會綜藝館
11月24日-25日 下午7時45分 (2小時)

非常林奕華《聊齋》舞台劇 (國語)

繼《賈寶玉》、《三國》、《恨嫁家族》林奕華與黃詠詩四度合作 「我不相信死後有另一個世...

非常林奕華《聊齋》舞台劇 (國語)
藝術 @ 香港文化中心 大劇院
2018年1月25日-28日

《七級豬集團》iStage 舞台劇

做人要有上進心,連升七級找知音! 《七級豬集團》由榮獲「香港舞台劇獎-最佳劇本」及六...

《七級豬集團》iStage 舞台劇
藝術 @ 上環文娛中心 劇院
2018年3月23日-25日

《聽搖滾的北京猿人》前進進戲劇工作坊

──Noosphere,一個精神互通的場域,進化的下一步,由物質層面轉向精神層面。 人類在生物層...

《聽搖滾的北京猿人》前進進戲劇工作坊
藝術 @ 牛棚藝術村 7號 前進進牛棚劇場
12月13日-18日 下午8時 (2小時)

上一篇網誌

10月26日, Timable
最近打開ig同facebook,都見到好多朋友洗板post紅葉相…呢個喺韓國南怡島,嗰個就喺日本河口湖……得喇,知你哋又有假又有錢喇!其

下一篇網誌

10月27日, Timable
一年一度瑞銀香港高爾夫球公開賽又黎啦!上年有超過4萬6千人入場,今年會唔會破記錄呢~有別於一般高爾夫球大賽,瑞銀香港高爾
留言

關於    歷史    聯絡    iOS, Android    條款    活動籌辦    伙伴    版權所有 © Timable Limited 保留一切權利