YouTube 影片

一年一度一月一屆風雲榜!
小T第四年親身參與KKBOX風雲榜,今次漂向南方移師高雄巨蛋。
見到得獎同表演名單,就知今次又會係一場Good Show!


打頭陣出場嘅係真天后aMEI張惠妹,觀眾們極之興奮!
然後突然Down了下來,因為係唱《身後》…實在太令人感動嘅一首歌…
跟住唱姐卵作曲嘅《連名帶姓》一樣咁正!
第三首《你說了算》都是新碟嘅歌,好一個短短嘅完美Performance !
跟住到aMEI嘅「偶像」,就係「寫歌給aMEI唱 我不是你偶像 我是你偶像的偶像」嘅葛仲珊Miss Ko,係勁嘅,點解人哋唱Pizza就得,我哋唱軟雪糕就唔得嫁呢可~


到咗是晚重點之一,Chef Le Mon!
冇見十年嘅經典熨頭熨Punk頭再度出現!
《因為愛所以 愛》又係經典之一,小T當年讀中學時唱K必唱!(年紀敗露)
新國語歌《異想天開》而家上KKBOX可以獨家優先試聽再翻聽啦!
跟住…當然係《活著VIVA》啦!現場當然係爆High 啦!!!
樂手仲包括王雙駿、Supper阿雞、Jason Kui、同鼓手阿權,個個高手,現場睇真係正到暈!
不過有人話Chef Nic有甩beat同唔啱音,原來係因為Chef Nic隻Ear Mon出現咗問題,先令到Chef Nic表演有啲失準,主辦同小T講Chef Nic好好好重視個表演,綵排到好夜搞到早一晚冇時間唧朱古力之餘,綵排嘅表現仲其實好過正場表演好多,真係好可惜 …不過事事力求完美嘅Chef Nic,可能會因此而想更快做返場完美嘅表演俾大家睇,聽講佢好似係想廸廸皮停車場開喎,o殊…


楊丞琳一口氣連唱《青春住了誰》《失憶的金魚》《仰望》《年輪說》好好聽,由當年嘅可愛教主到今日嘅全能天后真係成熟咗好多喇,不過佼哥一tag李榮浩,丞哥就hang晒機啦~ (笑到喊)


到GEM姐出場,現場反應堅勁,仲勁過一啲台灣本地歌手!
唱咗《再見》同《光年之外》真心壓場,然後同黃明志Gem咗隻《漂向北方》堅係好正嘅!
老老實實,你話佢強味濃又好咩都好,佢唱到堅靠播放率連續2年入KKBOX十大係勁嘅!
你話佢鳩叫咩,其好友黃明志即刻唱返首《飆高音》♫ 因為你我飆高音 就連香港阿棋都為我嘆息♫ 語帶雙關了吧 ~

到謝和弦,Sorly小T堅係冇聽過佢嘅歌,唱第一隻很冧冧豬的又跑足全場握手,咁偶像派小T都係坐陣先啦 (搖滾區好攰家嘛),點知第二首《愛不需要裝乖》忽然好Punk喎,隻歌又要幾好聽喎,乜咁多元嘅,究竟邊個先係真正嘅佢?!有溫柔一面又有型爆一面咁似我哋個柏豪BB嘅?


但今晚周柏豪就冇喇,周湯豪就有!
阿湯豪又Rap又跳,係好睇嘅,不如兩個周豪整返場Battle吖又!


跟住有亞洲創作天王JJ林俊傑,連唱《聖所》《我繼續》《黑夜問白天》《偉大的渺小》,真係正到爆,咩曲風都Carry到,Key可低又可高到爆,簡直係亞洲Bruno Mars!(笑到喊)
JJ真心勁,每次去KKBOX表演都係將成個個人演唱會濃縮成20分鐘咁Perform,好有Heart,冇得輸!


到盧廣仲,唱《魚仔》同新歌《幾分之幾》為香港個唱熱身喔!大家買唔買到飛呀?
一齊玩首《OH YEAH》玩咗好耐~


然後…終於…終於…終於到EASON喇!!!!
先來個Medley《土星環/你的背包/要你的 (interlude)/路...一直都在》!
其實Eason嘅國語歌真係好耐聽,越聽越好聽!
《謝謝儂》間一間場,再來Medley《Aren’t you glad/與我常在/兄妹/想哭/我們都寂寞》正到核爆!
跟住,係KKBOX 2017華語年度單曲榜第一位,即係足金金曲《讓我留在你身邊》!
Eason唱得好High好放!放到走咗一粒音 (笑到喊)!不過阿臣走音都走到好似假音咁好聽(笑到喊) (笑到喊)(笑到喊)!
電視直播之後,現場佼哥繼續同Eason chit chat,唱咗幾句《K歌之王》(國),仲一路唱住《十年》一路bye bye入後台。
EASON真係好好好好正呀!嗚呀~

每一次睇完風雲榜都唔知好嬲定好笑,但問嘅問題都係同一條「點解可以咁正?」
識嘅歌手,加埋超正Production,固然係正到爆;
唔識嘅台灣歌手,當場試聽一下,你都會覺得佢哋真係表演緊,而唔係就咁唱隻歌拎個獎咁(你懂的…);
歌手與音樂嘅多元,同觀眾嘅接受程度真係好高!
咁小T當然係同香港比較緊。
由譚校長年代到而家,主流都仲係舒情慢歌同悲慘情歌…
Rock呢?HipHop呢?EDM呢?唔係話一定要鍾意一定要爆紅,而係根本有人試都冇人肯嘗試去接受…
MC Jin咪又係要由鄰近國家爆紅返返嚟先有得Rap返個銀行廣告,你估佢之前冇喺香港唱過咩?然後過咗一排連檸茶都冇得佢Rap…
Rock嘅呢幾年好返少少,多得濕爬同Dear Jane等等,但都係仲未開到紅館...
頒獎典禮仲好笑,想當年叫四大頒獎典禮,而家有2個真係提到費事…
叱吒還好,總算係個有血有肉嘅Show,只係近年樂壇有點斷層才導致「可觀性」減低;
港台,今年看似進步了,將頒獎禮同個Performance分開,場表演Show睇落都OK的,陣容鼎盛咁,但睇落就唔對路,撐場的,仍然是左麟右李、太極、尹光、肥媽陳潔靈、郭富城、Eason…
新歌手呢?有呀!陳柏宇唱《愛的呼喚》周柏豪唱《一起走過的日子》囉…
喂~可唔可以有啲新嘢嘅呢?
你話佢今年係40週年咩?係呀~香港咪就係得最黃金嘅40年囉!
你睇風雲榜,aMEI唔會唱《原來你什麼都不要》楊丞琳唔會唱《曖昧》嫁,明知唱新歌觀眾唔會爆好反應都一定要做新嘢,因為你今日唔做,永遠不會再有新經典,只會固步自封食老本!
幾年來風雲榜年年精彩,小T仲記得呢3年來嘅MP魔幻力量、兄弟本色、玖壹壹有幾High!
今年有黃明志、周湯豪、謝和弦、小宇、J.Sheon、葛仲珊等,就算之後唔會keep住聽 (邊聽得咁多吖) 都至少聽過認識過。
而且,最重要的,年年都講,人哋係普選嚟,用播放率去計,冇得傾冇得呃!
如果香港樂壇頒獎典禮有普選,我相信克勤唔駛等咁多年,一早修成正果,入夠波就可以自由奔放再諗諗點樣突破。
睇返近年KKBOX風雲歌手(總播放率最高歌手),喂阿哥,唔係年年都有五月天周杰倫份嫁,真民意嘅嘢,香港識條鐵咩~
冇辦法啦~香港係老屎忽當道,老屎忽就係那些因為好忙所以僭建咗講句Sor9ly囉就繼續位高權重嘅人;但同時亦都係好忙於搵食嘅77歲阿婆就冇得一時唔小心而比人拉咗;
如果我是歌手,我都係乖乖地做幾首情歌出嚟拍下廣告拍下戲「食老本」搵錢分獎算啦!
試新嘢,有風險,觀眾唔受的,算啦~
記唔記得有歌手話「我討厭政治」呀?

個Show嘅Production真係正嘅,「必應創造」梗係有求必應啦!
小T 喺搖滾區One Night Stood咗一晚睇唔晒啲舞台效果,返去睇Replay先覺更加壯觀!
華語樂壇嚟講,KKBOX風雲榜以播放率嚟普選都可以算係最有代表性,如果大家想更多香港歌手得到呢個榮耀,大家都應該一齊用KKBOX聽歌,邊聽歌邊表達民意,用鍵盤嚟爭取民主不嬲係香港人嘅強項嚟家嘛 ,大家比啲心機喪聽,話唔埋下年可以推到柏宇BB上台北小巨蛋呢!大家加油!

華語樂壇需要KKBOX,KKBOX需要大家多多支持!
多謝KKBOX!

現場報導: 黑莓
相片來源: KKBOX 官方提供