唔使去日本!香港5大賞櫻熱點+開花預測

作者: Timable, 2月20日 (二) 下午1時23分

新年剛過,3月又係櫻花嘅季節喇!大家plan好幾時去日本賞櫻未先?!冇錢冇假期嘅,其實留喺香港都一樣可以欣賞到美麗嘅櫻花㗎~不過要賞花,都要夾啱時間嘅。根據往年經驗,嘉道理農場櫻花會係最早開(回帶:鐘花櫻桃x梅花 嘉道理農場有得睇 http://timable.com/blog/1579517),之後其他地方就會陸續於大概2月下旬開始開花,視乎天氣而定。而想睇櫻花滿開嘅朋友,就可能要等到3月上旬甚至係4月上旬喇。

長洲關公忠義亭
長洲忠義亭內種咗十幾棵台灣山櫻樹,係全港最大型嘅櫻花群。屬溫帶粗生植物,花嘅顏色非常鮮艷,花形細小而密,喺初春開始開花。期間唔少遊人都會慕名而來,好多時都人山人海。預計將會喺3月上旬開花。




將軍澳單車公園
將軍澳單車公園亦都係另一個賞櫻熱點!一嚟喺市區,交通方便;二嚟附近仲有大草地同唔少玩樂設施,啱晒一家大細嚟玩~不過呢度嘅鐘花櫻桃樹就比較疏落,同時背景亦都有好多高樓大廈會入鏡~預計將會喺3月下旬開花。



香港中文大學
中文大學有兩處地方都種有櫻花樹,分別係中大聯合書院校巴站旁邊嘅緋寒櫻,同埋新亞書院知行樓宿舍出面嘅河津櫻。預計將會喺3月上旬開花。




大帽山扶輪公園
公園內有38棵由由台灣送贈嘅緋寒櫻,開花時節全株無葉,花朵則密佈枝椏,花姿清麗壯觀,吸引咗好多人嚟影相打卡!預計將會喺2月下旬至3月上旬開花。


大埔科學園
喺科學園嘅巨型金蛋附近種有10幾棵櫻花樹,相對於其他賞櫻景點比較無咁多人,可以靜靜咁欣賞櫻花嘅美~預計將會喺3月下旬至4月上旬開花。




圖片來源:instagram / 民政事務局Facebook專頁 / 香港中文大學、中大傳動Facebook專頁 / 香港初級行山之友Facebook群組 /

撰文:小文青