五月天人生無限公司 入職守則!

作者: Timable, 5月3日 (四) 下午5時06分

五月天人生無限公司今次第一次喺香港開室外分公司,各位同事想俾五位老闆取錄就要注意以下事項啦!

交通資訊:
演唱會場地不設私家車位泊車位,大家盡量搭公共交通公具或者特設嘅巴士路線前往。
交通安排傳送門:
http://unusual.com.hk/event/mayday-2018/

入場前須知:
1. 提早入場 (7:15p.m開演,5:00p.m開放入場)
今次演唱會一場有兩萬人,而且入場前會有安檢,所以早啲到就唔怕打晒蛇餅等入場!開場都好精采,錯過咗就唔好啦~

2.購買正版螢光棒
五月天有出官方瑩光棒,正版會由官方控制識自動變色,老翻嘅唔識跟住變㗎,所以記得去番官方週邊商品攤位度買啦!或者環保啲,舊年嗰枝仲用得!

入場守則:


今次個入場守則水蛇春咁長,小T就節錄幾個特別要注意嘅!
1.場內係唔俾錄音、攝錄、直播、轉播及攝影!違者將會被邀請離場而大會毋須退款、負責或作出任何賠償。所以入場係唔俾帶任何攝錄設備(包括任何型號的攝錄機或可拆除鏡頭之照相機)(手提電話除外),記得大家係入場睇演唱會,唔係入嚟睇手機㗎!

2.唔好企上凳
今次有次演唱會有企位有坐位,坐位嘅同事記得唔好企上凳,危險之餘仲會遮住後面觀眾睇呀!而企位嘅同事亦唔好帶任何物料製成之大型三腳架、摺疊椅、凳子入場,攰就坐地下chill住睇啦~

3.唔好舉牌/燈牌/戴發光頭飾
同上一項一樣,舉牌會遮住後面觀眾視線。而燈牌同戴發光頭飾會影響演唱會整體燈光效果,你都唔想睇睇下演唱會突然有嘢係咁閃,閃到眼花啦~

4.唔好開遮
傳聞五月天主唱阿信係雨男,而天氣報告都話演唱會有機會落雨,但大家千祈唔好開遮呀,用雨褸啦!開遮就會你整到人,人整到你。大會都禁止入場觀眾帶任何長雨傘。(聽講落雨嘅話,現場會派雨褸,記得係聽講)

5.唔好帶喼/大型行李入場
演唱會場地話大唔大,話細唔細,大家排排坐,冇位放喼呀!大家亦講明唔會提供任何形式嘅寄存服務,同埋禁止攜帶超過 56 厘米 X 36 厘米 X 23 厘米的袋、盒或行李。


做個有質素觀眾:
五月天第一次喺搞室外演唱會,相信大家都好期待。為咗唔好由人生無限公司變成有限公司,大家記得完場後要執好自己啲垃圾!
另外,希望大家可以尊重表演者,喺團員talking嘅時候唔好大聲尖叫/咆哮啦!你講講下嘢突然有人大叫都會當堂嚇一跳呀,係咪?(重點係小T每次都會因為呢啲尖叫聲而聽唔到團員講咩呀,佢哋啲talking好似棟篤笑咁好睇㗎嘛XD)
同埋希望入場嘅觀眾可以用心欣賞演出者嘅表演,唔好入場睇騷都機不離手,上網睇facebook,食雞等等啦......
至於關於五月天同五迷之間嘅默契,小T認為唔需要強制所有觀眾follow,只有大家都用心投入睇演唱會就已經係一個好觀眾啦!
瑪莎多謝你

最後戴番個頭盔先,以上言論唔代表五迷同五月天~~~
想知更多詳情請到:http://unusual-hk.com/event/mayday-2018/

文:NC