分享

食平DD!父親節性價平三大推介

作者: Timable, 6月8日 (五) 下午1時20分

到咗父親節,想同老豆食好西,喂阿哥,間間又book爆晒,又set定晒呃錢menu,識食嘅,貴嘢梗係平日唔係大時大節食,同大節大時食返啲普通得嚟又好食嘅嘢啦,分分鐘仲少人過平時添!

嚟,小T 孝順老豆食好西三大推介!

1/ 沾仔記

已經好出名唔駛乜推介?聽埋我講先啦!呢間真係小T最愛!喺香港,係好難得有餐廳肯專心賣好少items嘅,沾仔記嘅料就係得招牌雲吞、巨型鯪魚肉球同鮮牛肉!少樣數先會做得精!真心$30喺中環食真堅係抵!重點食,一家三口嗌三碗單拼,然後開心Share料咪最抵囉!當然,嗌雙拼咪再開心啲囉!

地址: 中環威靈頓街98號地舖



2/ 筷子記

父親節帶老豆食車仔麵都叫食好西?你又聽埋我講先啦!呢間係非一般車仔麵,係澳式車仔麵!澳洲都有車仔麵?唔係澳洲呀!係澳門呀!可以嗌嘅料同平時嘅港式車仔麵係好唔同嘅!當然仲有其他澳門特色食物,例如豬扒包都好好食ga!直頭好似去咗澳門咁!唔駛搭船,又唔駛等港豬噢大橋通車,你話是咪爽先~

地址: 中環威靈頓街85-89號群英商業大廈A1號舖




3/ Grill ขุนทอง

星期日仲要父親節咁多人,不如食輕便啲但一樣超好食!呢間串燒鋪超高人氣,平時你哋蒲完老蘭都一定食過,咁當然你唔好話俾阿爸知啦,但可以帶佢嚟食嘛。位就唔算多嫁嫁喇,再唔係,嗌返幾寸,再過7仔買罐啤喺街邊啤啤佢,話唔埋佢會將當年追阿媽嘅浪漫史講過你知呢~嘢食就樣樣好食嫁喇!隨意嗌~

地址: 中環蘭桂坊德己立街17-19號地下





做乜介紹3間都係中環?因為食完仲可以上大館睇免費嘅「創造未來的歷史」光影表演嘛!是咪好貼心呢~
詳情: http://timable.com/event/1642744


祝各位父親節快樂!