暑假已經差唔多過咗一半~係時候帶小朋友放低功課同iPad,出去開開心心放下電喇!今個週末有唔少親子活動(室內室外都有)~非常適合一家大細一齊玩,有啲仲啱出生無耐嘅BB參加㗎!即刻睇吓編輯推介嘅8個活動啦。

【星期六(7/28)】

#1: 愉景灣夏日滿Fun 2018(離島)
時間:上午11時 ‑ 下午6時
詳情:https://timable.com/event/1666053
今個星期六、日天氣都唔錯,不過溫度都幾高(攝氏28-33度)~怕熱嘅朋友不妨帶小朋友去愉景灣參加夏日嘉年華。 主辦單位係沙灘設置咗一系列嘅大型充氣遊戲,組成「恐龍歷險樂園」。當中除咗充氣滑水梯仲有水上派對,同埋唔同嘅Q 版運動遊戲,包保小朋友玩到唔想走!


#2:「泡夏 泡夏」互動裝置及遊樂園(中環)
時間:中午 ‑ 下午6時
詳情:https://timable.com/event/1672193
夏天,為大地帶嚟雨水……唔係呀!今次係帶嚟泡泡~講嘅唔係真嘅泡泡,而係望落一模一樣嘅裝置藝術。除咗唔洗擔心小朋友整污糟手,小朋友又唔洗擔心泡泡會穿,無論大人細路都可以瘋狂打卡影相啦~(編按:啲泡泡真係好靚~記得要帶相機去影呀!)


#3:「F1 Kids夏日小巡警」(西區)
時間:下午3時 ‑ 5時30分
詳情:https://timable.com/event/1670539
留咗咁耐室外,係時候入返商場涼一涼冷氣~西區一個商場最近就搞咗個夏日小巡警嘅體驗運動~等佢地可以一嘗做小警察嘅滋味。

#4: 一田「玩具祭」(西區)
時間:上午9時 ‑ 下午9時30分
詳情:https://timable.com/event/1671259

想買平價玩具嘅話,就要把握機會啦!時關今個週末就係一田「玩具祭」嘅最後幾日~其實有時玩玩具真係好過玩電話~對眼仔好啲,又可以訓練小朋友嘅立體觸覺。

【星期日(7/29)】

#5: 挪亞方舟「職業特工大本營」(馬灣)
時間:下午1時 ‑ 8時
詳情:https://timable.com/event/1644811
尋日就帶咗小朋友去扮小警察~如果唔夠喉嘅話,可以去埋呢個職業特工大本營,畀小朋友親身試做八種唔同職業,包括飛機師、消防員同賽車手等等,同場仲有轉為小警察而設嘅射撃訓練。透過摸擬嘅職業訓練~除咗可以滿足小朋友嘅好奇心,仲可以啟發佢地唔同方面嘅興趣添!

#6: 《小雨點.大體驗》寶寶音樂劇場 (葵青區)
時間:中午 ‑ 下午12時35分/下午3時 ‑ 3時35分/下午5時 ‑ 5時35分(三個時段)
詳情:https://timable.com/event/1646959
如果小朋友太細,對職業可能未有太多認識,小編推介佢可以參加呢個互動音樂劇場。呢個劇場專為手抱同爬行BB而設,以不同嘅裝置,透過佢地嘅觸覺去認識呢個大自然。

#7:「LEGO我們的遊樂場」互動遊樂區及期間限定店 (荃灣)
時間:上午10時30分 ‑ 下午9時30分
詳情:https://timable.com/event/1667552
LEGO可以話係大人細路都鍾意嘅玩具之一。為慶祝LEGO®顆粒誕生60週年,荃灣廣場舉辦咗一個大型互動遊樂區,除咗展出唔同年代嘅經典LEGO展品,仲有限定店畀大家買到心頭好!(小心又畀老婆話你嘥錢買玩具。)