搭港鐵都有得打卡?深水埗站換新裝

作者: Timable, 9月17日 (一) 下午2時30分


大家呢排去深水埗港鐵站有冇發現車站內外多咗好多設計?原來港鐵同薩凡納藝術設計大學香港分校(SCAD 香港)合作,喺站內唔同位置包括車站大堂同月台展出唔同藝術品。由透明圍欄、站柱以至特別訂造嘅創意座位均遍佈車站範圍。


深水埗站月台空間重新裝設咗由Boroka Kopacz同Najah Dunham設計嘅座椅「Chairs of Sham Shui Po」。座椅設計靈感源自大排檔嘅凳,以唔同高度為乘客提供更靈活嘅座位選擇,鼓勵大眾喺候車期間產生更多互動交流。至於由Nicholas Wang同Savannah Wilkins所設計嘅「Urban Identity」 圖案,則係用作牆壁同隔牆裝飾,旨在表達車站同社區互相連繫。


有份參與今次項目並設計「Urban Identity」作品嘅SCAD香港校友Savannah Wilkins表示,對今次項目充滿熱誠同期待,「港鐵一直是香港城市生活中不可或缺的一部分,因此我們視今次合作為將藝術帶入深水埗社區日常生活的最佳機會。」

而「Chairs of Sham Shui Po」設計者之一嘅Boroka Kopacz補充:「我們很高興看到自己的設計概念在深水埗站實現出來。早前我們於社區進行了大量研究,希望透過藝術反映深水埗生活文化。」


今次嘅合作揀咗較有香港地道風情嘅深水埗站而非較多遊客嘅尖沙咀同旺角等站,相信將藝術進一步融入社區。而其實外國好多地方都會將地鐵站設計到美輪美奐,吸引遊客影相,成為景點之一,唔知香港港鐵站會唔會做到呢?

所有圖片由SCAD香港提供
文:NC