歌迷受咁耐苦,政府終於做返啲嘢,雖然遲就遲咗啲,不過總算好過冇。消息話民政事務局交文件俾立法會話近年「黃牛飛」問題越趨嚴重,雖然只係有部份受歡迎嘅節目先會出現問題 (係呀~有啲Show真係炒唔起㗎),但為咗回應社會訴求 (是咪要多謝你),考慮以修例同行政措施打擊「炒黃牛」喎,包括建議減少內部飛認購比例、用實名制售票,同埋將紅館同伊館呢啲熱門政府場地納入埋《公眾娛樂場所條例》 (係呀~其實一樓炒紅館飛都唔犯法㗎),令到第時炒紅館犯法有阻嚇性咁話喎!

民政事務局提交嘅文件中講到,2017-18年度喺紅館嘅音樂會、棟篤笑等大型收費娛樂節目有29個 (共111場演出),分別佔紅館全年所有活動約69%,而首日公開發首嘅內部飛比率就係69.6%,即係大約有3成飛比大家買。有啲絕望座位表望落去目測真係好少,有啲大Show如五月天又真係多啲飛,average返呢條數都好似make sense嘅~

文件中亦講到,其中一個可有效打擊門票炒賣嘅方法就係實名制賣飛 (嘩~唔該晒喎~),但由於涉及到私隱、同操作上嘅困難,例如入場時間會較長等,康文署會同政府資訊科技總監辦公室研究下點搞喎~咪先~康文署有冇見過Steve Jobs先?!

另外份件都有話紅館同伊館嘅內部飛比例嘅上限有下調空間,但考慮到演出業有所關注,認為唔適宜立即大幅度降低內部飛比例,應該逐步下調餉比例。

而現時紅館同伊館等康文署場地係唔受《公眾娛樂場所條例》所限嘅,政府話會審慎研究一個喺法律同執行上較穩妥嘅方案,即係有機會會將紅館炒飛刑事化,嚇下啲牛牛轉行去耕田唔好再炒飛咁。