首屆「KKBOX香港風雲榜」完滿結束!小T同大家率先重溫現場精彩片段!

每年台灣嘅「KKBOX風雲榜」頒獎典禮都係華語樂壇其中一個年度音樂盛事,與其話係頒獎典禮不如話係一個音樂表演!有別於香港固有嘅頒獎禮,「KKBOX香港風雲榜」係一個滿足視覺、聽覺加心靈享受嘅頒獎禮,將台灣嘅頒獎模式帶到嚟香港,小T好慶幸自己有機會去到現場體驗呀!

視覺上,「KKBOX風雲榜」貫徹一向高質嘅舞台規格,為每一位歌手貼心設計左唔同嘅舞台效果,包括係燈光設計、LED大螢幕背景、甚至係觀眾手中嘅螢光棒,都會跟隨歌曲轉變節奏或顏色,無論係台上定台下都達到一致、融洽嘅畫面。除左欣賞歌手,小T成晚都俾個螢幕畫面吸引住,佢地真係設計得好靚!

聽覺上,首要嘅一定係歌手本身把靚聲啦,第一位打頭陣嘅「年度風雲歌手」就係皇上張敬軒,帶同11位弦樂團成員出場,唔知係咪為嚟緊個中樂演唱會做定預習呢?皇上唱現場比起CD聽更有氣勢,聽到出哂耳油!最後仲率先唱出當晚12點先正式曝光嘅新歌《YOU》俾大家聽,連同16位dancers大跳熱舞,差啲以為自己睇緊佢演唱會T^T


第二組出場嘅係C Allstar,DJ King 好有心咁整左首 EDM版《人人》做開場,真心唔差呀!之後四子就合唱左《音樂殖民地》、《薄情歌》同《再不再見》,小T好滾動,有幸聽到休團後嘅C Allstar同台演出!


「表演嘉賓」SHAUN係韓國組合The Koxx嘅EDM DJ,大家可能唔識佢個名,但應該都會聽過佢首《Way Back Home》,佢啲音樂係幾有感染力㗎!

「年度風雲歌手」之一唱作才女AGA江海迦,唱出《3AM》、《小問題》同《一》三首大熱歌,亦係小T好鍾意嘅歌!順帶一提,AGA只係出道左短短幾年已經好有台風!


之後就到小巧-鄧小巧以「年度編輯推薦歌手」身分出場,第一首就唱左《芭樂之石頭芭樂RockBallad》。小T係第一次聽小巧唱現場,唱得夠穩定,好好聽!

初為人父嘅「年度風雲歌手」 Jason 陳柏宇,一出場就坐定定彈結他唱《無限大》,實行要冧爆大家!之後仲唱埋《認真如初》同做飯歌《別來無恙》,真心正呀!


遠道而來嘅「風雲大使」蔡健雅 Tanya一口氣唱出《空白格》同《陌生人》兩首名曲。一開口已經好有氣場,係實至名歸嘅金曲歌后!之後仲帶嚟新歌《我要給世界最悠長的濕吻》。


另外香港「風雲大使」有謝安琪同Supper Moment,雖然呀Kay耳機全程受干擾,但都好專業地唱哂5首歌,包括同6號合唱《羅生門》後再同Sunny合唱《橙海》、《Shallow》等,都算係順完成表演呀!


接住繼續有嚟自台灣嘅「風雲大使」-小隊長盧廣仲!一如以往都係拎住個結他自彈自唱先,總共唱左三首歌,包括有《我愛你》、《OHYEAH!!!》同都係當晚仲未曝光嘅新歌《愛情怎麼了嗎》。(其實佢仲唱左幾句《幾分之幾》架,係小編最想聽佢唱嘅歌呀T^T)


壓軸出場唔洗講大家都知一定係Joey容祖兒啦!唱左長達11分鐘嘅《心之科學》、《花千樹》、《破相》、《連續劇》、《天窗》、《這麼近那麼遠》Medley 同仲未派台嘅新歌《PrettyCrazy》,High爆全場!


心靈上,呢個無容置疑係一個具可信度嘅頒獎典禮,根據樂迷點播次數而產生嘅年度得獎名單,單單呢點已經俘虜左唔少香港樂迷嘅心喇!能夠見到咁多位亞洲實力歌手齊集香港同台演出,實在唔係一件容易嘅事。

小T十分期待有第二屆「KKBOX香港風雲榜」,香港人要繼續支持香港樂壇呀!

文: vc