香港8大緩跑徑 全攻略!

author: Timable, 25 Mar (Mon) 12:21pm


近幾年,緩跑已經成為香港人嘅常態運動。不論男女老少,返工前定放工後,你身邊都有一個朋友係有緩跑嘅習慣。今次就等小T介紹8條緩跑徑比你哋,有室外又有室內,仲有一條係你附近。咁就唔使怕風吹雨打,日曬雨淋啦~

室外:


馬鞍山海濱長廊

馬鞍山呢幾年越來越多人搬入去,政府係2010年興建咗一條海濱長廊比眾多居民。馬鞍山海濱長廊位於馬鞍山沿海一帶,係沙田區內第二條大型海濱長廊,前望沙田海,遠望八仙嶺羣峯,海天一色,盡入眼簾。真係一路做運動,一路睇靚景~

地址:馬鞍山寧泰路 
開放時間:全日開放
緩跑徑長度:3.2公里
電話:2643 5320
設施/配套:男、女洗手間、太極場、足健徑、長者健身園地、狗公園、兒童遊樂場、貯物室、單車泊車位


啟德郵輪碼頭

啟德郵輪碼頭嘅路徑相對平坦,簡單又非常適合長跑。可以由九龍灣運動場作起點,跑到啟德郵輪碼頭。日跑嘅,企係啟德橋,可以清楚遠望維港對岸景色。如果夜跑的話,可以走上郵輪碼頭既空中花園,180度望盡維港景色。

地址:香港九龍城啟德發展區承豐道33號
開放時間:全日開放
緩跑徑長度:約8公里
電話:/
設施/配套:男、女洗手間


將軍澳海濱公園

於2012年6月落成,由將軍澳市中心(怡明邨)至日出康城(港鐵康城站)。途經大部份都係無敵海景,可以遠眺小西灣、杏花邨同鯉魚門海峽景色。沿途上落坡度較低,適合新手跑者,再加上呢度空氣清新、有山有海、視野廣闊,心曠神怡啊喂~

地址:西貢將軍澳唐俊街 
開放時間:全日開放
緩跑徑長度:1.6公里
電話:2791 3100
設施/配套:自行車道、休閒區、綠化地帶、寵物公、蔭棚連坐椅



寶雲道健身徑

港島嘅美景跑步路線,莫過於寶雲道健身徑。佢係半山至灣仔區一帶居民喜愛嘅緩跑徑。路經全平路,又四通八達,連貫中環丶灣仔丶跑馬地半山。周圍都有茂盛嘅樹木,空氣清新。住港島區首選!

地址:香港寶雲道公園
開放時間:全日開放
緩跑徑長度:3.5公里
電話:/
設施/配套:休憩亭,流動公廁,平行木
景點:維多利亞城界石、姻緣石、石公婆神龕、四面佛、灣坊亭碑文

室內:


調景嶺體育館

係2015年啟用,算係設施最齊全,冷氣又相對舒適,真係打風落雨都無有怕~場內有兩條跑道,側邊仲有位俾各位跑手熱身,非常之貼心。不過要注意嘅係,跑道部份路段彎位好多,小心安全。

地址:將軍澳翠嶺路2號
開放時間:每日上午7時至晚上11時(定期保養日除外)
緩跑徑長度:125米/150米
電話:2481 5033
設施/配套:12米高運動攀登牆、兒童遊樂場、園景花園、草坪、長者健體園地、健身站


上水保榮路體育館

2012年啟用,係北區區內唯一一間提供室內緩跑徑的體育館。場內都有兩條跑道,三至四人一齊慢跑都仲得~總長162米,算係比較長嘅一條。

地址:新界上水百和路19號
開放時間:每日上午7時至晚上11時(定期保養日除外)
緩跑徑長度:162米
電話:2639 2979
設施/配套:美式桌球室;3條攀爬線戶外運動攀登牆、羽毛球場、籃球場、排球場、乒乓球室、多功能活動室、健身室、兒童遊戲室


天水圍天暉路體育館

2012年啟用,分咗3條跑道,相對其他比較闊落,唔駛左避右避。地下鋪咗鮮綠色,跑上來好似置身係綠油油嘅草園,人都舒服啲~

地址:天水圍天瑞路63號
開放時間:每日上午7時至晚上11時(定期保養日除外)
緩跑徑長度:約130米
電話:2473 029
設施/配套:5條攀爬線嘅戶外攀石牆,供持有總會認可資格嘅人士使用。羽毛球場、籃球場、排球場、乒乓球室、多功能活動室、健身室、兒童遊戲室


香港公園體育館

1991年啟用,是本地最早提供室內緩跑徑的體育館。可能係較早落成嘅關係,緩跑徑上無任何指示同線,只係好普通嘅闊跑道。其次,轉彎位係非常之急,接近90度轉彎,新手並唔建議係度緩跑。當然,交通方便亦都係一個因素。唔係下下出到天各一方~

地址:中環紅棉路29號
開放時間:每日上午7時至晚上11時 (定期保養日除外)
緩跑徑長度:約150米
電話:2521 5072
設施/配套:羽毛球場、籃球場、排球場、標準壁球場