精選「狗」大放電好地點

author: Timable, 8 Apr (Mon) 6:30pm

近年寵物公園愈起愈多,但唔少寵物公園設施簡陋,配套不足。一個唔小心中伏去咗,狗仔玩得唔夠盡興之餘,更可能分分鐘失望而歸,所以為大家介紹九個設施較為整全嘅寵物公園,一於搵日同汪星人開心放電。

彭福公園(新界)
地址:新界沙田區沙田馬場跑道內圍中央
面積:80,936 平方米
配套設施:大草坪(寵物活動區) 、遊樂場、洗手間
開放時間:
非賽馬日:夏季(五月至九月) 上午9時至晚上7時30分 / 冬季(十月至四月) 上午9時至晚上6時30分
*試閘日則於上午9時30分開放 (一般為星期二及五)
沙田日馬賽事(一般為星期六或日):上午9時 - 上午11時30分
沙田夜馬賽事(一般為星期三):上午9時 - 下午5時

彭福公園最出名就係草地任你行,狗仔一定可以盡情放電,加上同馬路、大街有所距離,狗主大可放心任狗仔奔跑。附近就有免費大型停車場,唔洗周圍搵地方泊車。可惜公園無寵物相關嘅設施,例如寵物沖洗間之類,狗主可能要多個準備。
*去前記得上網睇多次開放時間,因為偶爾會有特別安排,令開放時間有所更改,甚至暫停開放*

環保大道寵物公園(新界)
地址:將軍澳環保大道
面積:4,000 平方米
配套設施:沖洗間、狗廁所、停車場、洗手間
開放時間:上午7時至晚上9時

環保大道寵物公園雖然草地唔大,但勝在設施夠齊全,有沖洗間比狗仔洗腳仔,同埋狗狗廁所,最細心係分咗大狗細狗區域,狗主可以更放心。公園設有停車場,但車位唔算多,得35個私家車位,假日有機會無位,最好搵定後備泊車嘅地方。
*呢頭蚊蟲頗多,去前記得帶定蚊怕水*

海皇路花園(新界)
地址:屯門海皇路 (屯門游泳池側)
面積:2,400 平方米
配套設施:寵物遊樂設施、狗糞收集箱、寵物廁所和草坪(寵物活動區)、蔭棚連坐椅、避雨亭
開放時間:全日開放

藍地寵物公園(新界)
地址:青山公路與黃崗圍路交界 (港深西部公路橋底)
面積:2,772 平方米
配套設施:寵物遊樂設施、狗糞收集箱、寵物廁所和沙池(寵物活動區)
開放時間:全日開放

呢兩個狗公園係屯門,設施差唔多,有地方遮蔭擋雨。最大差別係海皇路花園有個大草地,加埋多種遊樂設施夠玩足一日,狗仔實無悶;而藍地寵物公園最特別係設有沙池,狗主唔洗帶狗仔遠征到沙灘,狗仔都可以試下係沙地玩。

山頂花園(港島區)
地址:柯士甸山道40號對面
面積:97,000 平方米
配套設施:洗手間(設有暢通易達洗手間)、狗廁所
開放時間:全日開放

有「秘密花園」之稱嘅山頂花園點少得一片大草地,加上附近有唔少英式建築,可以幫狗仔瘋狂影靚相。唯一留意嘅係要行20分鐘左右嘅斜路,記得因應返狗仔體力再計劃!
*另一個公園柯士甸山遊樂場係唔接受寵物進入*

中西區海濱長廊 – 中環段(港島區)
地址:金鐘龍和道
面積:4,700 平方米
設施:寵物公園及寵物通道
配套設施:草坪、涼亭、洗手間 (設有暢通易達洗手間)、狗糞收集箱及洗手設備
開放時間:全日開放

想同狗狗共享美景嘅可以試下去中西區海濱長廊寵物公園(中環段),望到維港嘅海景建築,附近都有小食亭,同狗仔玩完,都可以買小食醫下肚。不過相對其他公園,呢度嘅狗狗設施比較少,得水喉同狗糞收集箱,最麻煩係得一條路線行入狗公園範圍,怕麻煩嘅去前要諗清楚。
*寵物公園範圍要經龍和道嘅指定路線進入*

鰂魚涌海濱花園(港島區)
地址:鰂魚涌海裕街
面積:3,000 平方米
設施:寵物公園
配套設施:涼亭、座椅及狗糞收集箱
開放時間:全日開放

怕海濱長廊中環段狗公園麻煩嘅不妨考慮埋鰂魚涌海濱花園,同樣有無敵大海景,帶埋屋企人一邊吹住海風一邊同狗仔玩,夫復何求!雖然無大草地比狗仔奔跑,但都有約半公里嘅長廊,唔怕無地方比狗仔放電。旁邊有約50個車位嘅停車場,尚算方便。
*靚景自然受歡迎,比起其他狗公園,呢個位置頗多跑步人士,狗主要留意返*

蝴蝶谷道寵物公園(九龍)
地址:深水埗蝴蝶谷道2號
面積:7,000 平方米
配套設施:寵物活動區、寵物遊戲設施、狗糞收集箱和臨時洗手間
開放時間:上午7時至凌晨12時
蝴蝶谷道寵物公園係九龍區最大嘅狗公園,園內有好多遊樂設施,例如模擬排水管,等狗仔挑戰。狗主都可以放心比狗仔跑,因為出入口有雙閘設計,狗仔唔容易衝出公園範圍。附近都有咪錶位同停車場,泊車都算方便。

油尖旺寵物公園(九龍)
地址:九龍渡船街 / 欣翔道交界
面積:2,600 平方米
配套設施:公園內設有流動洗手間、流動殘疾人士洗手間、狗廁所、避雨亭和公園長椅
開放時間:上午7時至凌晨12時
另一個位於九龍嘅油尖旺寵物公園都係坐落於鬧市,主要有三塊草地比狗仔跑,加上公園都設有圍欄,唔洗驚狗仔走咗去鬧市。相對蝴蝶谷道寵物公園,呢邊就無狗狗遊樂設施,不過都鄰近公眾停車場,狗主可以再衡量邊個啱心水啲。

文:SN
圖片來源:網絡