十個為甚麼典解一定要去Clockenflap

作者: Timable, 2015年11月9日 (一) 下午7時22分


有冇聽過 / 有冇去過Clockenflap? 舊年有成4萬幾人去Clockenflap,如果你冇去過,Well~都有可能嘅~話晒香港有成七百幾萬人。但係,你睇完呢篇文,今年就真係冇可能唔去,典解? 睇完咪知十個為甚麼典解一定要去Clockenflap囉!

一/ 得佢一個 - 有啲歐洲地方好似荷蘭咁基本上個個Weekend都會有大大細細嘅音樂節。咁香港呢?聽台灣歌的有《呼叫音樂節》,從前嘅《Wild Day Out》同《銀礦灣沙灘音樂節》又冇咗喇,要喺香港Enjoy一個真.國際級音樂節,就係得Clockenflap一個咁大把咋!

二/ 感覺外國 - 香港都好真係好少呢類又音樂又藝術又親子嘅戶外活動,加上大家席地而野餐,在草地上奔跑嬉戲,又好多男女親熱場面,當然唔少得台上表演都以外語為主,不期然會唔記得咗自己身處香港,土地問題、鉛水、膠官等彷彿突然間消失晒~

三/ 今年最大 - 西九文化區講咗咁多年,都真的動工了。聽聞下年會有好大面積動咗工,即係唔會有今年咁大面積。所以話如果你想去一個最享受最大最好feel最睇唔晒最大笨象嘅Clockenflap,今年係最好機會了!

四/ 梗係聽歌 - 香港不乏外國歌手/樂隊來港開Show表演,但機場/會展/九展外國Show動輒一千幾百。今年Clockenflap有超過150個大大細細嘅Line-up,爆紅嘅有,indie嘅又有,local嘅又有,總之咩類型嘅音樂都有,嚟自唔同國家嘅音樂,miss咗呢世都未必有機會聽得返Live!

五/ 勁多個台 - Clockenflap嘅舞台,仲多過你屋企部電視嘅(免費)電視台! 10個舞台同時或梅花間竹咁上演精彩音樂表演,鍾意邊個就睇邊個,同你喺紅館被迫睇廁所位完全唔同feel,有得揀,你至係老闆~

六/ 一家大細 - 如果你屋企有小朋友,Weekend又冇得唔理佢哋,大概你都冇得帶埋佢哋入機場睇外國Show吧! 嚟Clockenflap就可以,除咗有大草地俾佢哋跑跑跳跳,仲有好多親子活動俾同小朋友一齊得咁開心! 唯一擔心嘅就係小朋友玩到唔捨得走,但老豆想去睇THE LIBERTINES,阿媽想去睇盧廣仲,典算?

七/ 美食佳餚 - 玩足成日,肚仔梗係會餓,但如果你講「醫肚」就未免太冇要求。Clockenflap精挑細選咗好多香港至新至潮嘅熱門餐廳在場提供美食,當然唔少得有酒精類飲品等大家聽歌聽得盡興啲.If you drink,除咗Don't Drive,仲有Don't Kai~ 咪做傻事呀~

八/ 文化藝術 - 除咗音樂,藝術同文化一直都係Clockenflap「最核心嘅核心價值」,所以周圍都有藝術展品,又有歌劇、雜技、奇趣體操同喜劇等世界級表演,仲有電影棚放映多部本地同來自世界各地嘅短篇電影同動畫,唔理你係真定偽文青,都一定啱晒你!

九/ 朋友歡聚 - 成日同啲朋友都唔知Weekend有咩好玩,雖則用咗Timable之後都已經多嘢玩咗好多,但Clockenflap簡直就係精選中嘅精選! 一大班Friend,霸個好位,玩嘅玩,訓嘅訓,睇Show嘅睇Show,咁樣樣過一個Weekend,唔叫爽皮叫咩呀?!

十/ 無敵日落 - 叫得西九梗係向西,望住無敵維港景,到5點幾開始日落,海面變成金黃色,天上嘅雲變成橙紅色,仲有粒雞蛋黃,加埋草地、音樂、啤酒、朋友、自由等等,簡直想有阿學友哥嚟唱返隻《夕陽醉了》,不過未等到學友哥,我都已經醉咗lu~

文就睇完,是咪欲罷不能先?
睇埋Line-up,更加想聽日就係Clockenflap啦!
Clockenflap Line-up on Timable:
http://timable.com/page/clockenflap?m=f