同「老」「細」一天遊

author: Timable, 26 Mar (Tue) 11:26am

相信唔少家庭都會為假日活動頭痕,特別係小朋友同長者之間掙扎,一嚟小朋友需要地方放電,二嚟又要方便長者活動,所以同大家介紹下既啱小朋友玩又可以同長者一齊去嘅地方,盡情享受家庭樂啦!

彩榮路公園(九龍)
地址:觀塘牛頭角彩榮路88號
開放時間:全日開放
費用:免費入場

彩榮路公園由礦石場改建而成,所以公園以岩石作為主題,設有岩石展區,小朋友唔洗上山下海都可以觸摸各種岩石,家長同長者都可以同小朋友一齊學習。
摸完岩石,小朋友可以去公園嘅遊樂設施,有唔同難度嘅攀爬架,有別一般街邊遊樂場得瀡滑梯咁悶。重點係公園設有完善無障礙設施,有升降機來往上下層,通道設計都平坦寬闊,就算長者行動不便或坐輪椅,都無有怕!同場仲有長者健體園地,長者都可以玩埋一份。家長都可以事先準備定小食,玩到攰可以係休憩涼亭坐底開餐。
*彩禧路公園同彩榮路公園相近,不過相對地彩禧路公園嘅樓梯比較多,行動不便嘅長者未必適合。

交通:
從彩虹站A1出口步行坪石公共運輸交匯處一樓平台,搭83A小巴,途經四個站,彩福邨落車,步行約兩分鐘至彩榮路公園

九龍灣B出口步行約二十五分鐘左右至彩榮路公園

南昌公園 (九龍)
地址:九龍深旺道20號
開放時間:全日開放
費用:免費入場

想去野餐唔洗入迪欣湖,南昌公園都得,而且面積大,鄰近港鐵南昌站,交通方便。大地任你行,唔少草地都有樹蔭,唔怕得個曬字。園內有唔少座位,老人家唔方便坐地下嘅都可以坐木椅,一齊享受野餐樂!
另外公園有兩套嘅遊樂設施,一套難度較低,另一套就難度高啲。長者都唔洗得個望字,因為呢度都有長者適用嘅健體設備。
如果春天去嘅仲可以睇埋黃花風鈴木,樹上開滿黃色嘅花,景色一流。不過早前受山竹吹襲唔少大樹都受到破壞,所以為黃花而去嘅真係要留意下!

交通:
南昌站站D1出口,橫過馬路後便達公園入口

屯門公園(新界)
地址:屯門屯門鄉事會路
開放時間:
爬蟲館-每日上午9時至下午6時 (包括公眾假期)
模型船池-每日上午7時至下午11時(包括公眾假期)
兒童遊樂場-每日上午7時至下午11時(包括公眾假期) 每星期一上午7時至下午1時暫停開放,以便進行場地保養工作。 (如星期一為公眾假期,保養工作將順延至下一個工作天進行)
其他公園設施-全日開放
費用:免費入場

屯門公園係動靜皆宜嘅family day好地點。環境優美有花有草有樹唔洗講,公園設有爬蟲館,有平時少見嘅爬蟲類,例如豹紋龜、傘蜥等。
睇展館當然睇唔到一日啦!但無有怕,因為園內仲有其他設施,可以分為「玩」同「賞」,「玩」基本上有兒童遊樂場,特別啲有模型船池可以放下船仔,再好動啲可以去球場打下羽毛球。「賞」就有香花園同玫瑰園,大把靚花任睇,同時有自然保育園地,欣賞之餘,家長都可以教導小朋友珍惜大自然。
如果玩到肚餓,無自備食物都唔洗周圍覓食,因為公園內有快餐亭,可以買小食醫下肚,繼續玩!

交通:
屯門西鐵站B出口,步行約十五分鐘左右

屯門西鐵站轉乘505、507或751輕鐵線前往市中心站,上天橋轉右行到達

大埔海濱公園(新界)
地址:大埔大發街大埔海濱公園
開放時間:
昆蟲屋-上午8時至晚上7時
香港回歸紀念塔-上午7時至晚上7時
草地滾球場-星期一 (公眾假期除外) 關閉 星期二至五 上午8時至下午1時 下午6時至晚上10時 星期六、日及 公眾假期 上午8時至晚上10時
門球場 上午7時至下午6時
公園其他設施-全日開放
費用:免費入場

著名嘅大型公園去到厭,可以試下去大埔嘅海濱公園,有足夠嘅草地野餐,又可以同小朋友放下風箏。玩到攰上回歸塔吹下風望下海,斜路行上去,老人家唔洗擔心爬樓梯,太熱就去昆蟲館一邊「過冷河」一邊同「老」「細」認識昆蟲。當然唔少得遊樂場比小朋友放下電,長者健體園地都係附近,一於「老」「細」一齊玩。
如果係春天去,公園花卉都會開滿花,如紫荊花、雞蛋花等,唔洗出國都可以置身「花花世界」。
回程可以去一轉大埔超級城,行下一田食埋飯先走。

交通:
大埔墟港鐡站行至巴士總站出口,搭接駁巴K17或九巴71S 前往富善邨總站落車,經過富善邨商場,沿住指票牌行5分鐘到

大埔墟港鐡站行至巴士總站出口,搭港鐡巴K12到大埔中心一田落車,沿林村河步行約15分鐘到

北潭涌傷健樂園(新界)
地址:西貢大網仔路北潭涌
開放時間:上午9時至晚上9時
費用:免費入場

想玩下其他活動,可以試下燒烤。西貢北潭涌傷健樂園設施較為完善,適合不同需要嘅傷殘人士,設有暢通易達洗手間,唔洗擔心人有三急嘅問題。不過石路始終容易跌親或阻住輪椅前行,大人可能需要份外留意。
北潭涌傷健樂園最特別係有適合輪椅使用者嘅燒烤爐,即使長者行動不便,都可以遠行享受燒烤樂。雖然郊外燒烤需要自備食材同炭火,不過偶然一次郊外活動,必定係難忘有趣嘅回憶。

交通:
由鑽石山港鐵站搭往西貢巴士總站嘅九巴 92 至北潭涌站落車

搭的士由西貢市到北潭涌 (車資約六十元左右作為參考,需視乎路面情況)

珍寶海鮮舫(香港島)
地址:香港仔黃竹坑深灣碼頭徑
開放時間:
珍寶王國-星期一至六 上午11時至晚上11時30分
星期日及公眾假期 上午9時至晚上11時30分
龍軒-星期一至五 中午12時至下午3時及下午5時30分至晚上11時30分
星期六,星期日及公眾假期 上午12時至下午4時30分及下午5時30分至晚上11時30分
費用:免費上船參觀

如果假期同老人家、細路落街飲茶飲到悶嘅不妨試下去香港最具特色嘅海上食府--珍寶海鮮舫歎茶,電影《食神》中周星馳最后爭奪寶座嘅情節就係呢度取景!
碼頭有免費接駁小輪,同老人家、小朋友搭去海鮮舫,沿途欣賞港島南區海岸景色。海鮮舫嘅建築都極為吸睛,可以一家人飲完茶再慢慢參觀。
*珍寶海鮮舫於2019年4月22日至5月7日暫停營業,前往船塢進行例行檢查及維修,最新情況記得留意公司網頁同facebook,費時白行一轉啊!

交通:
港鐵香港站D出口步行至中環交易廣場巴士總站,搭乘城巴75到深灣碼頭,搭免費接駁船即可到達

或搭乘城巴70到香港仔碼頭,搭免費接駁船即可到達

太平山頂(香港島)
地址:香港島太平山頂
開放時間:
山頂凌霄閣-早上10時至晚上11時 (星期一至星期五) 早上8時至晚上11時 (星期六、日及公眾假期)
費用:免費入場
香港杜莎夫人蠟像館-早上10時至晚上10時 (星期一至日及公眾假期)
費用:有各類嘅門票和套票,去前可以先上網格價及購買門票,會著數啲
搞錯3D藝趣坊-早上10時至晚上11時 (星期一至日及公眾假期)
費用:免費入場

行厭大商場嘅試下向高發展,去太平山頂一日遊,雖然係個講到爛嘅景點,不過又真係好多人未去過。
凌霄閣有「搞錯3D藝趣坊」同杜莎夫人蠟像館,搭山頂纜車上山,再舒舒服服睇展覽,同各「明星」嘅蠟像自拍下。加上最近杜莎夫人蠟像館做緊優惠,由即日至2019年5月5日,香港居民憑香港永久居民身份證於蠟像館正門售票處購買兩張即日成人門票,即可免費獲贈即日成人、小童或長者門票一張。
到夜晚又可以睇到維港靚景,一日family day就咁過。

交通:
從中環8碼頭搭乘15C號巴士,或港鐵中環站 J2出口步行至花園道山頂纜車站,再搭乘山頂纜車登山。

港鐵香港站D出口的中環交易廣場巴士總站,搭乘新巴15到達

撰文:SN
圖片來源:網絡