2019下半年必睇後續電影

author: Timable, 15 Apr (Mon) 7:10pm

相信唔少觀眾今年最期待電影一定係上緊嘅《復仇者聯盟4》,但2019年除咗《復仇者聯盟4》之外,仲有唔少電影嘅後續上映嫁!小T今次就為大家整理好下半年唔可以錯過嘅後續電影,等你唔洗周圍搵都知幾時上~

《哥斯拉II: 王者巨獸》
上映時間:2019年5月9日
巨獸再次登上熒幕,今集係講述神秘生物學研究所 – 君主(Monarch)派遣成員與巨獸,包括哥斯拉、摩斯拉(Mothra)、拉頓(Rodan)、及哥斯拉最強嘅宿敵王者基多拉(Ghidorah)正面開戰。一直被視為傳說嘅遠古超級生物再度崛起,群起爭取地球主權,令人類的存亡再次面臨危機。章子怡都有份演出今集電影,終於唔係景甜啦⋯⋯
預告片傳送門→https://www.youtube.com/watch?v=bZcE8E0GYHc

《再見亦是狗朋友2》
上映時間:2019年5月16日
延續上集故事,狗仔貝利(Bailey)經歷咗幾次輪迴,每一次都會返到主人伊雲(Ethan)身邊,但完成今次使命之後,佢就要開始另一個全新歷程,就係照顧伊雲孫女思希(CJ)。因為主人伊雲嘅兒子同媳婦離婚,孫女思希要跟隨母親搬走,伊雲認為貝利幫助咗自己嘅人生唔少,希望貝利下次轉世可以代替佢照顧思希,由貝利陪伴思希成長,觀眾再次由狗仔嘅視角思考生命意義。
預告片傳送門→https://www.youtube.com/watch?v=UYQZdAX1agc

《殺神John Wick 3》
上映時間:2019年5月16日
前集發展到殺神約翰・維克(John Wick)違反殺手界鐵規,係殺手酒店殺死一名高級成員後,被酒店老闆榮士敦革除殺手會籍及發出高達1千4百萬美金懸賞令追殺,只給予黃金一小時逃生;連約翰嘅恩師 - 殺手集團高層「The Director」亦無計可施。當全城殺手都𥄫實約翰呢嚿肥肉時,佢得到昔日戰友蘇菲(Sofia)拔「槍」相助。兩人面對無盡殺機,一路殺出生路。
預告片傳送門→https://www.youtube.com/watch?v=Fu3VcjLYFYM

《變種特攻:黑鳳凰》
上映時間:2019年6月6日
故事設於1992年,《X戰警:天啟》十年之後,由X教授所率領嘅X戰警已被視為國家英雄。贏咗呢個全新地位後,佢地因此踏上了一場外太空救援任務;突然太陽閃燄意外擊中X太空梭,令「鳳凰」琴・葛蕾(Jean Grey)無意間獲得一種「不懷好意並渴望力量嘅全新能量」,逐漸化身為能力強大嘅黑鳳凰。同時嚟自外星嘅邪惡勢力企圖利用琴嘅強大力量去統治世界,此時萬磁王反過嚟幫助所有嘅X戰警,令X戰警可以對抗呢個極為恐怖嘅黑鳳凰。
預告片傳送門→https://www.youtube.com/watch?v=bgj_FF9Ef6g

《蜘蛛俠:決戰千里》
上映時間:2019年7月4日
繼《復仇者聯盟4》後,當梅嬸發現並理解彼得(Peter)身為蜘蛛人嘅事實,兩人與快樂・霍根(Happy Hogan)投入史塔克工業嘅助貧慈善基金會。某日,彼得同朋友仔前往歐洲進行兩週嘅校外教學。因為受到與復仇者聯盟合作嘅影響,彼得想暫時放下「蜘蛛人」嘅雙面身分,好好地陪伴朋友仔參與校外教學。然而好景不常,嚟自外星嘅威脅,再度影響到彼得生活。神盾局搵上彼得,而彼得必須再度換上「蜘蛛人」服裝,並與神秘客合作面對元素眾嘅威脅。
預告片傳送門→https://www.youtube.com/watch?v=uNYeLDe4FNM

《反斗奇兵4》
上映時間:2019年7月11日
嚴格嚟講,第4集唔係上一集嘅後續故事,反而似一套愛情喜劇,講一個愛情故事,重點唔再係玩具同小朋友嘅交流。
胡迪一直對自己係世界上嘅位置充滿信心,佢首要任務係照顧細路,無論係安仔定寶妮。有日寶妮係房間裡添加了一個新玩具「小叉」,小叉成日大叫「我唔係玩具!」又靜雞雞逃走,搞到胡迪同一班玩具要周圍搵佢,點知搵搵吓就撞番好耐無見嘅牧羊女-寶貝,仲遇上好多新角色添!
預告片傳送門→https://www.youtube.com/watch?v=oguhkxTscmc

《未來戰士6》
上映時間:預計2019年11月
今次真係I'll be back,呢套電影係官方公告為1991年電影《未來戰士續集》嘅直接續集,而且片商至今都保持神秘,無透露任何電影故事大綱。但靈魂人物莎拉・康納(Sarah Connor)將由首兩集嘅琳達・漢密爾頓(Linda Carroll Hamilton)相距二十八年後再次飾演,而係每集電影都有出現嘅未來戰士T-800將會再次由阿諾飾演,粉絲們點可以錯過今集嘅《未來戰士》呢?
預告片傳送門→https://www.youtube.com/watch?v=1uiBQ3ztIvo

《魔雪奇緣2》
上映時間:2019年11月22日
let it go~let it go~《魔雪奇緣2》今年終於上啦,官方暫時未有透露太多劇情,預告片中只見愛莎(Elsa)嘗試用冰雪魔力越過巨浪,相信佢地又會展開新一輪嘅冒險故事,記住密切留意官方公佈嘅消息啦!
預告片傳送門→https://www.youtube.com/watch?v=FkK-nZaUG6g

撰文:SN
圖片來源:網絡