草泥馬聽就聽就多,隔唔中上網都會見到其搞鬼短片,而家只要喺香港都有得近距離同佢地接觸喇!

位於錦上路嘅呢個農莊入面除咗種植了許多有機農作物外,仲有可愛嘅羊羊同兔子,最近仲喺澳洲帶咗4隻超得意草泥馬嚟香港𠻹!小動物都可以近距離接觸,餵佢地食草,撫摸佢地超柔軟嘅毛毛!


園區好大好寬敞,可愛嘅羊咩咩同兔仔喺入口等住大家,只要到旁邊士多購買鮮草($20 一份)就可以進行餵食喇!羊羊們都超級為食,差啲想爬出欄外呢!而兔仔就斯文得多,見到小編拎住鮮草就奔奔跳過嚟,好可愛啊!小編都忍唔住同佢地瘋狂自拍!


再向前行,經過遊樂區就到我地今日嘅重頭戲—草泥馬!只要額外付$60 就可以進入佢地基地,近距離互動一番!


4隻小朋友超級可愛,3隻係咖啡色,1隻米白色,小編只要手上拎住鮮草,佢地就會向我狂奔,非常熱情!


親親完草泥馬仲可以到旁邊近賞不同農作物,咁啱小編嚟嘅季節應該係菠蘿當造時期,農田上佈滿一個個又大又圓嘅菠蘿!口水都流出來了!


園區內亦設有多個打卡位,荷蘭風車、搖椅等,無論同閨密定伴侶嚟都保證你地可以玩足成日!


當然亦唔少得親子區域啦!除咗可以參與唔同工作坊外,園內亦有許多供小朋友遊樂設施,絕對會令小朋友流連忘返!


玩到成身汗最適合食冰涼嘅食品,呢個冰火菠蘿包套餐($60)就最適合不過!熱烘烘嘅菠蘿包外皮包著冰涼菠蘿雪糕再配上新鮮有機菠蘿,口感、味道一流!飲埋自家制農場菠蘿蜜,清熱又潤口。


旁邊嘅紀念品區更可以買返隻草泥馬公仔返屋企,為是次旅程劃上完美句號!

如果仲有時間的話,小編建議大家仲可以去埋附近嘅大欖涌郊遊行山徑,飽覽元朗平原的壯麗風景!

地址:新界元朗錦田錦河路四排石村
交通:錦上路站A出口,直行穿過停車場轉左直行入隧道再直行就到。(沿路有清晰指引)

入場費-

農莊遊套餐$100(成人)包括:
· 通行証一張
· 夾公仔錢幣2個
· 羊駝摺紙一張
· 祈福牌
· 農莊紀念品一份

農莊遊套餐 $80(小童)包括:
· 通行証一張
· 夾卡通沙畫
· 夾公仔錢幣1個
· 充氣堡壘/釣魚/沙池 (三選一)
· 農莊紀念品一份

額外:$100 成人/$80 小童 20分鐘羊駝區與草泥馬互動

撰文:Carrie Ho
ch@timable.com
剪接及攝影:Molly Cheung
mc@timable.com