聖誕節就快到喇,梗係要約埋好姊妹/男朋友,一齊去食個聖誕限定Tea,感受下聖誕氣氛同打卡啦!今次小T就揀咗五間唔同Feel 嘅酒店同餐廳帶大家一齊試下啦!




最少女心!莓果主題下午茶


講聖誕節就只係諗起雪人、聖誕鹿!?呢間酒店下午茶以莓果做主題,在食物中加入少女最愛嘅亮麗粉紅色,色彩鮮豔又不失聖誕歡樂氣氛,酸酸甜甜,為味覺帶來衝擊!

酒店景觀開揚,識揀一定係坐喺落地玻璃窗旁嘅位置,夕陽下享受美酒佳餚真係人生一大樂事!

飲品方面,為咗配合閃耀主題,酒店推出2款非常ig-able 嘅雞尾酒,一款以威士忌為主,加入蘋果汁及檸檬汁;而另一款則以氈酒作基底,配以蜜桃甜酒、桑莓果茸、迷迭香等製作而成。

W酒店「閃耀莓樂」下午茶套餐
詳情:https://timable.com/event/1880371






最有聖誕氣氛!英倫風下午茶

呢間酒店今年嘅主題係「情迷倫敦」,酒店大堂滿布聖誕裝飾,未行到餐廳門囗,已經感受到濃濃嘅歐陸聖誕氣氛,啱晒打卡!酒店仲特別為今個節日設計明信片,餐廳同酒店內客人都可以到前檯索取,填完真係會幫你寄出㗎!

倫敦攝政街+英式家居客廳+粉紅電話亭+粉紅郵筒


而今次嘅重點當然係「情迷倫敦聖誕」下午茶啦!4款精緻咸點配以7款甜點,每一款唔單止造型別緻,味道亦十分適合香港人口味。而令小T最有驚喜係清新嘅龍蝦撻配椰菜花蓉,酥脆撻皮配以口感彈牙龍蝦肉,十分滋味!甜點方面則推薦小鹿蛋糕,香滑朱古力配以榛子醬慕絲,唔會有過份甜膩嘅感覺〜


咁得意嘅造型真係好難抗拒啊!!


*每位+$100 仲可以享用升級兩小時無限量供應普羅賽克氣泡酒聖誕香料酒,氣泡酒可以加自己鍾意嘅水果。


香港朗廷酒店「情迷倫敦聖誕」下午茶
詳情:https://timable.com/event/1880239
*即日起到12月15號前網上預訂更可享有8折優惠





最靚景!無敵大海景下午茶


有咩正得過一邊高空俯視維港美景,一邊嘆住高級美點?呢間餐廳嘅食物由香港麗思卡爾頓酒店主理,質素絕對有保證!套票仲包含觀光門票,最適合同你嘅愛人嘆完下午茶後,到觀景台飽覽醉人嘅景色!

口感幼滑的栗子慕絲、香甜不膩的聖誕乾果蛋糕及香醇濃郁的朱古力泡芙,果仁愛好者不容錯過!


日光從玻璃窗穿透,咁靚嘅景色梗係要影多幾張相,留住最美一刻!

天際100「聖誕二人下午茶」
詳情:https://timable.com/event/1880399






最Chill池畔!美顏下午茶

下午茶有靚景、有美食仲有禮物收!? 呢間酒店嘅聖誕限量下午茶同瑞士護膚品牌GLYCEL合作,推出「燕窩魚子醬煥膚下午茶」,最適合貪靚嘅女仔!茶點包括六款甜點及五款精選鹹點,小編最愛燕窩法式栗子撻燕窩葡撻,滋潤嘅燕窩令甜點變得更高級!


酒店環境寧靜寬闊,天氣晴朗時仲可以到户外泳池旁邊打卡!


凡惠顧下午茶仲會贈送燕窩及魚子肌膚護養產品,包括燕窩緊緻修護精華(3ml)、燕窩緊緻修護眼部精華(3ml)、燕窩完效極緻乳霜(3ml)、細胞昇華面霜(7g)及全效升級版魚子極緻修護面膜。女士更可免費體驗價值港幣 $1,960 的 75 分鐘深海能量細胞修護療程!食完即刻同好姊妹去做個靚Facial 過聖誕!

皇冠假日酒店「Club @28 x GLYCEL 燕窩魚子醬煥膚下午茶」
詳情:https://timable.com/event/1880362






最新潮!健康素食下午茶

銅鑼灣素食下午茶,食物全部無奶、無蛋、無麩質,素食漢堡及蕃茄肉丸更使用Green Monday 未來牛肉,口感同牛肉非常相似!一齊為環境出一分力!!


下午茶造型以可愛小熊為主題,以可持續發展概念的倒數日曆為靈感,影相打卡一流!


The Cakery「素食餐單聖誕下午茶」
詳情:https://timable.com/event/1880430
*Lee Gardens Club 會員獨家尊享8折優惠




撰文:Carrie Ho (ch@timable.com)
剪接及攝影:Molly Cheung (mc@timable.com)