啱啱過咗聖誕節,準備迎接新一年,願2020年香港同Timable 的大家都更好!嚟緊一月有幾日假期,大家諗好去邊度玩未呢?小編今次帶大家嚟元朗,有得食、有得玩、仲有得打卡!

第一站 大棠紅葉打卡


每年12月-1月係大棠紅葉季,遊人都爭相去欣賞香港嘅紅葉景色,雖然大家都知道呢到嘅紅葉一定無喺外地嘅咁靚、咁紅,但同一班朋友襯住呢個時間放鬆下去行山、睇下景色,感受一下身邊嘅各位都衝住紅葉而慕名而來嘅氣氛,都係一個不錯的活動!


呢到真係人山人海,要搵位影相的確有小小難道,不過,只要去前做小小功課,睇定邊幾個位置同角度影相比較靚都可以成功打卡!

大棠楓香林
星期六、日及公眾假期可乘座特別車K66由港鐵-朗屏站到大棠山道




第二站 地道台灣小店

呢間台灣小店由來港11年台灣人主理,無華麗嘅裝潢,亦都無高級嘅食材;有嘅係店主用心同誠意炮製嘅古早味台灣美食。當日小編同老闆傾計,完全感受到佢對於每一個菜式嘅認真;店主話佢地最著重嘅係「時間品質」,紅燒牛肉麵嘅湯底係用9個鐘,利用牛肋條、牛肉條、滷包等熬製而成;而香腸更是在香港自設工廠製作,材料100%都係豬肉;全部食物都不加添加劑、味精,每一道菜都是由老闆親手炮製,難怪能保留街坊食客的心!


小編仲試過鹽酥雞,使用雞腿肉,肉質較嫩,可配古早味冬瓜茶,清涼又美味!


古月聚台灣古早味美食
元朗馬田路20-30B號安寧大廈地下2號舖




第三站 人氣日式甜品小店

咖啡室係元朗人氣小店,小編當日去到店舖已經係Full house,入面大部分係年輕人,氣氛環境舒適,適合同朋友嚟食甜品,飲杯嘢、傾下計。佢哋嘅甜品全部都係人手制作,小編當日試咗葛餅,口感煙韌,外層被黃豆粉及抹茶粉覆蓋,葛餅本身味道較清淡,可沾煉奶+黑糖醬帶出甜味。


另外仲有抹茶味卷蛋,使用日本丸久小山園抹茶,內層的抹茶吉士醬軟滑;飲品方面有特飲—極光,紫藍色嘅蝶豆花遇到酸性的青檸汁會變色,混合茉莉花有機綠茶,味道似清淡版的檸檬茶。


旮旯
元朗裕榮徑11號好旺洋樓地下16號舖




第四站 錦田彩色木屋露營區


喺元朗市中心玩咗半日最好就緊係搵個地方歇一歇,休息下,錦田呢個渡假營今年3月份開張,佔地5萬平方米,入面有16間彩色小木屋,每間屋都係小房間,可以比你同朋友歡聚一晚;屋內設備齊全 最多可容納6個人,每間均有獨立浴室、床、煮食用具、雪櫃,亦可自備食物燒烤。


玩樂方面,大朋友可以租用Partyroom,唔少得可以唱K、玩board game 仲有足球機𠻹!小朋友亦都有超大地方比佢哋放電,無論係遊樂場區,跳彈床,沙池等都令小朋友樂而忘返!另外可額外租借小型電動車,成為賽車高手!

注意!除夕所有房型已經爆滿,如果假日想去玩嘅話可以嘗試查詢農歷新年假期。另外場地有晒牌照,玩得安心又放心!

小木屋度假營
元朗 水尾村

撰文:Carrie Ho (ch@timable.com)
剪接及攝影:Molly Cheung (mc@timable.com)