不嬲有話每日飲少少紅酒係健康嘅,但原來唔止紅酒,香檳都佢嘅好處,唔怪得知呢幾日香檳仲難買過漂白水啦!咁大家就一齊睇睇飲Champagne有咩好處:

1) 冇咁肥
都市人最怕肥,飲得多啤酒就一定有啤酒肚;而紅白酒一般都有135~200 KCal (一杯),而相同份量嘅香檳就係100 KCal以下,即係飲同一份量都會瘦啲!

2) 腦仔健康啲
有英國大學研究指出,每星期飲三杯香檳可以有效增強大腦健康。個研究係將一堆老鼠分開有飲同冇飲香檳兩堆,飲足6星期之後捉佢哋玩迷宮,結果係有飲香檳嘅鼠鼠比冇飲嘅多出20%成功逃出迷宮!鼠鼠好叻呀!而當中仲有幾隻識開口唱gip gip聲《你把我灌醉》添!最尾呢句講下笑嘅啫~

3) 皮膚靚啲

有皮膚科醫生話香檳入面嘅抗氧化特質,可以幫助肌膚排毒。而香檳入面嘅酒石酸亦可以令肌膚令令,而對於油性肌膚仲有抑菌、控油嘅功效。嘩咁好,咁香檳咪即係飲得嘅神仙水?!

4) 心臟健康啲

功能同紅酒一樣,英國大學研究亦證明咗一日飲兩杯香檳對心臟同血液循環都有益,可以減少心血管疾病同中風嘅風險,當然,畢竟香檳含有酒精,都唔好飲太多呀,適可而止就最好。

5) 令人飲少啲

香檳有氣,飲香檳同見到香港啲官廢噏一樣,會搞到成肚氣,有飽肚感,飯都食少幾啖,比起其他冇氣又高酒精成份嘅酒,自然會飲少啲,咁就冇咁易飲醉啦。

6) 令人心情愉快

約定俗成,通常係有喜慶事先會開香檳,你應該冇聽過人話「借香檳消愁」,加上香檳甜甜地,飲香檳就自然會令人有開心嘅感覺,當然,如果遇著真係有喜慶事,飲香檳就真係喜上加喜喇!


注: 以上所指的英國大學研究為英國雷丁大學(University of Reading)於2013年發表的研究