今日教育局宣佈停課至4月20號,小朋友可能開始掛住同學仔同老師,未必明白點解要留喺屋企咁悶。以下繪本就係一個好好嘅途徑,向小朋友解說同教育相關資訊。家長同小朋友一齊讀繪本,仲係個好好嘅親子活動,增進感情!

《不一樣的2020 口罩下的微笑》


作者:Hello Bonnie 國際親子台
繪者:U Made This?
可以透過「Hello Bonnie國際親子台」facebook專頁索取

繪本由經常滑手機的小女孩開始,作者想透過小女孩令讀者反思,以往有冇將手機取代人與人之間嘅相處呢?之後就會開始講疫情帶來嘅生活改變,例如公園冇哂小朋友嬉戲,餐廳又冇哂食客等等。亦有提及因為有人吃了蝙蝠,所以引來疾病,而且好容易傳播。所以可以開心放心咁同親友聚餐,都唔係必然嘅事。繪本亦有教導小朋友正確的衞生常識,並灌輸在困難下要互相幫忙的概念。

《抗疫小夥計》


作者及繪者:李揚立之醫生

繪本內有很多可愛動物角色,分成八部份向小朋友解說,包括病毒的基本介紹、正確衛生習慣、常見病徵等等。呢本繪本無咩故事相連,但畫風一樣好可愛,每個事項都有圖畫解說,增加小朋友的印象。

《你離我太近了,請給我一點空間!》


作者:克里絲蒂安.瓊斯

繪本主角係一位生性熱情的小河馬—哈里森,佢好鍾意識朋友,亦好鍾意同人接觸,但有時候實在靠得太近啦,令老師同同學們都有困擾。依家疫情咁嚴重,要令小朋友明白同掌握人際距離,咁樣對雙方都有好處!

《哈啾!我感冒了》


作者:千美眞
繪者/攝影者:李芝殷
譯者:魏嘉儀

故事中嘅阿雄感冒,佢嘅器官於是開始傾計,討論到底阿雄做咗咩而導致呢次生病?係因為琴日一口氣食咗兩支冰淇淋?還是睡覺唔記得蓋被,令肚仔著涼?定玩玩具玩到太晚,令眼睛太疲勞?繪本可以引導孩子檢視自己嘅生活習慣,做咗咩會降低自己嘅抵抗力,以後又要點改善呢?

《你的身體為什麼可以保護你?》


作者: 安德雷.邦歇瑞、羅弘.沙巴提耶
原文作者: Andre Benchetrit、Laurent Sabathie
繪者: 蕾貝卡.兜特梅(Rebecca Dautremer)
譯者: 黃秀錦

呢本係一本教小朋友愛自己,保護自己,就先從認識自己身體開始!原文係一本法文故事!希望小朋友思考過,照顧自己身體,保持健康,都係自己責任嚟㗎!一齊睇下身體有咩超能力啦。