屯門有條彩虹欄杆小徑,各位屯門人可能唔陌生。但超級鍾意彩虹色嘅小編,就好鍾意呢個地方啦。不過都要聲明先,理想與現實總有差距,彩虹欄杆經歷日月洗禮後,現場睇冇咁鮮色,要配合埋日光同後期調色,張相先夠靚!

到達屯門港鐵站後,C3出口左轉,沿住杯渡路向山嘅方向行,穿過天橋就係青山公路青山灣段,見到對面何福堂中心隔離有條小徑,就係今次郊遊嘅起點啦!一開始緊係冇彩虹欄杆,只有黃色欄桿,沿住行上山,用石屎鋪成嘅梯級比較整齊,唔算難行。見到第一個分岔路口,要向右邊行,一直行到去下一個分岔路口,往屯門徑方向行。之後會見到一個警告牌,大家唔好轉右行,要繼續一直行,就會見到彩虹欄桿。

圖片: Instagram @ownurstory_hk

圖片: Instagram @cara_yeung

離開彩虹欄桿,就會有小木橋,雖則又係理想與現實總有差距,但其實都係個不錯嘅打卡位,只係需要後期調色啫。再向前行又會遇到分岔路口,呢次往右轉上山,行大約十五分鐘就會到最高點,再沿住鋪好路嘅山徑落山,飽覽城市風景之餘,仲會見到藍地水塘,穿過虎地燒烤場,向右行到盡頭,見到個虎地村牌,跟住條樓梯落去,就會到達藍地水塘。望住藍地水塘折射藍天,真係咩煩惱都唔記得哂!但大家要記住,嬉山莫嬉水,唔好落去玩水呀!打卡時都要小心啲。離開藍地水塘後,就可以一直行返出去藍地大街,沿途會經過一條村同石礦場。


路線:
屯門站->何福堂中心->屯門徑->彩虹欄杆->若夢園->虎地->藍地水塘->藍地大街

全場:
約5KM

需時時間:
約兩小時

BYOB Coffee Roaster
呢間餐廳係出名食豬手同意粉,餐牌選擇唔太多,但樣樣都係店主精選!最緊要係認證良心店,咁就食得放心啦。



地點:屯門青桃徑5號文翔大廈地下2A號舖
電話:23001163
營業時間:
星期一至日 12:00 - 21:00

圖片: Instagram @norawychung, Instagram @keeeeeeeeo, 網絡
撰文:ZOE