去唔到日本,就去本地日系小店食餐好,都一樣有驚喜。西營盤一帶有好多特色餐廳,Good Good位於第二街,喺地鐵站附近,非常易搵。”Bring Better Food to the People We Love”係Good Good宗旨。小店樓高兩層,下層主要係吧枱,約提供五個座位,上層有時亦會擺設展覽。小編星期日下午到訪Good Good,非常滿座,店外一直都係排隊嘅人,如果想去嘅朋友,最好盡量避開假日時間啦。內部裝修好精緻,員工亦都好友善,連食具係用日式陶瓷,相當有質感。




Good Good主打素食同甜品,主餐份量唔算太多,但女仔食就剛剛好夠飽。GoodGood飯係一個定食set,有玉子燒、牛油果同菇,加埋醬油,就係簡單又好食嘅飯。定食有湯同水果附上。


另外,仲食咗椒麻麵,唔似超市買返嚟個種即食椒麻麵,亦冇重味精嘅感覺,但一樣食到麻辣味。小編鍾意溏心蛋,流心得嚟,仲食到醬油味。


甜品就食咗提拉米蘇同Classic creme caramel ,焦糖布甸擺盤好可愛,用咗高杯擺放焦糖布甸,食落唔會覺得太甜。另外提拉米蘇就係用日式嘅陶瓷杯擺放,有咖啡味同好鬆軟,但就唔係濃酒味嘅提拉米蘇。



Good Good
地址: 西環西營盤第二街地下2號A舖
營業時間:星期三至星期日 12nn-7pm (星期一二休)

圖片: ZOE
撰文: ZOE