在家抗疫嘅日子停不了,最近恢復返home office,多咗時間喺屋企,緊係進行大清潔啦。根據外國文章"How to burn 600 calories cleaning your house: Research reveals the most demanding chores (and why two hours of cleaning is better than a 5km run)”,研究透過安裝追蹤器喺測試者身上,測出邊種家務最可以消耗最多嘅卡路里。研究結果顯示,原來集中做兩個鐘家務,平均可以消耗到600卡路里,比起跑5公里所消耗嘅374卡路里仲要多。

當然做家務係不可能代替運動訓練,不過抗疫時期,郁吓好過唔郁啦!

行樓梯掉垃圾 30分鐘消耗249卡路里
好多人掉垃圾可能只係掉出同層嘅後樓梯,但如果每晚行遠啲扔,上落多幾層,就可以利用行樓梯呢個過程嚟消耗卡路里。或者可以拎垃圾到屋企附近嘅垃圾分類筒,進行分類回收。行樓梯時,可以兩級上,消耗卡路里效果更顯著。

清潔窗戶 30分鐘消耗172卡路里
清潔窗戶係收緊bye bye肉嘅一項家務,因為清潔過程需要凌空手臂,更要做出重複嘅清潔動作,會用到背部同腹部嘅肌肉。如果唔想只係郁到一邊手臂,清潔窗戶時可以運用雙手,或交換運用,咁就唔會一邊手酸軟啦!

掃地及拖地 30分鐘消耗145卡路里
掃地同拖地基本上係抗疫期每日必做。用掃把掃地再加拖地,兩項加埋都要用上半個鐘,比起單用吸塵機,流汗效果更明顯,可以燃燒到145卡路里,等同跟咗15分鐘跑步機㗎啦。所以大家唔好懶,今日開始就改用掃把同地拖啦!

洗碗 30分鐘消耗69卡路里
香港地家庭人數唔多,普通家常便飯通常要洗嘅碗都唔會太多。但其實洗碗唔止係手部運動,仲可以訓練臀部同大腿,洗碗時可以同步做後抬腿練習,有助臀部變得更緊實。首先,一隻腳向後抬起,膝蓋要保持微微彎曲,保持一陣呢個動作,腳就可以放返原本位置,交替重複咁做,就唔會浪費咗洗碗時間。

清洗浴缸 15分鐘消耗100卡路里
呢項都算係小編覺得最辛苦嘅家務,一來浴缸有深度,需要彎身進行清潔;二來清潔浴缸上嘅污漬的確要用好大力氣。但只要你努力出盡力洗刷15分鐘,就可以燃燒到100卡路里,同做咗30個「深蹲跳」差不多。而且過程中會用到肩膀同手臂嘅肌肉,要小心唔好拉傷呀。