因為工作關係,小T都喺土瓜灣待過一年幾時間。雖然稱唔上好熟悉呢區,但就發現到好多小店,係一個好特別嘅社區。未有疫情前嘅土瓜灣,有好多朱古力店、手信店,仲有好多內地旅客,一車車咁落客。所以趁依家冇咁多旅客嚟香港,去土瓜灣舊區行吓,到訪唔同小店,做「一日遊客」。

urbanspace 都市空間


urbanspace 都市空間位於土瓜灣巷弄嘅書店cafe,最近搬左新鋪頭,變大咗又靚咗!入到去坐低,再望望土瓜灣呢個舊區,真係感覺到係兩個世界嚟。小店環境好舒適,由一對母女主理。店主鍾意韓國文化,所以店內書藉好多都係翻譯書。呢個空間仲有咖啡室,係由店主媽媽「煮」理,相當溫馨。佢哋出品嘅全日早餐同三文治都係街坊至愛!

地址:
土瓜灣美景街45號地下

圖片來源: [email protected]

The 59 Tattoo and Barber Shop


小店主要為做紋身同男士理髮為主,雖然未必人人都需要去,不過小T最欣賞呢間店鋪嘅風格,係好用心打造嘅復古風,絕對唔係hea裝懷舊風!相信好多鍾意復古打扮嘅朋友都想去朝聖吓。


地址:
土瓜灣明倫街1號

圖片來源: [email protected], The 59 Tattoo and Barber Shop FB專頁

青春工藝


各位文青一定要認識嘅一個地方!青春工藝係一間藝術工作室。星期一、二晚佢哋有個「痛哭酒館」活動,目的係開放一個平台俾大家傾吓計,放鬆吓,亦歡迎討論社會議題。佢哋亦會賣街坊手作產品、紡織品,與其話係一間小店,佢哋更加似一個「基地」,集合各路精英,發揮所長!

地址:
土瓜灣鳳儀街6號地下

圖片來源:青春工藝FB專頁