呢排都好多人講Netflix套《Money Heist》,小T就睇晒喇,冇啲失望,但都會等S5大結局嘅;提示返,頭2季唔是Netflix Original嘅,係西班牙嘅local TV拍完後Netflix覺得正就接手拍落去;睇落前後係好consistent嘅,至於點解小T覺得麻麻地,就有以下10個點啦~絕對歡迎討論吖!

01/ 教授嘅初衷從不是劫富濟貧或反建制,2次行劫係分別紀念阿爸同阿哥,而第1次完成後亦都只係嘆世界;當然作為劇本可以天馬行空,亦可以係純犯罪嘅,但純犯罪嘅話,主角都應該要係無惡不作嘅大罪犯;如果係有學識之士而缺乏反建制/公民抗命嘅目的,少咗道德立足點,觀眾好難真心站喺佢一方;大部份嘅劇照都有嗰個面具,但原來到頭來都唔是反建制的,fake咗

02/ 民眾冇可能咁樣大規模支持挾持人質嘅悍匪,立論站不住,痴線嘅咩,有埋火箭炮,挾持咁多人質,劫完一次又一次,班民眾真係會喺出面yo yo yo打氣?就算香港都唔會咁,因為個劫案都唔係針對黑警; 再者,佢哋偷嘅係國庫,亦都冇宣稱偷完分畀大家,根本佢地就冇宣傳個「理念」

03/ 關鍵時候總係唔開槍畀對方走咗去,例如S2差婆放走教授(可能係因為愛而冇咗責任啦)、S4 Rio放走食蕉阿頭(腳都唔射下),而S2後門雙方交火警方亦弱雞到爆,明明無限武器可以硬攻,但仲弱過索咗冰嘅黑警,手榴彈都掉得一粒咁多,銳武裝甲車呢?

04/ 個教授其實有咩咁叻呢?唔太覺,劫鑄幣廠同金庫個plan都唔係佢諗嘅,之前上嘅堂都只係犯罪心理學101同差佬SOP吧,基本嘢,execution嘢,第2次hack晒差佬通訊都係靠$搵班以色列佬就搞掂晒,連裝粒偷聽器喺眼鏡都慳返,咁樣易玩過S1/2好多喎

05/ 成個Planning遠不及19幾年前嘅"Prison Break"幾廿手準備,雖則到最後都係stick to個Masterplan,但中間都幾多估計唔到嘅枝節,Drama嚟講可以係好睇嘅,但角色嘅神級程度嚟講,教授就不及當年嘅Michael Scofield喇

06/ 手執國家機密只要係用嚟威脅兩嘢咁大把,明明可以逐啲玩,引發外交風波,但都只係輕輕帶過「總之我啲機密喺我手」,有欠深度,而西班牙總統從來冇出現過,成件事就縮喺鑄幣廠同金庫,唔似Netflix一貫嘅廣闊視野 (雖則"Dark"同"Ozark"都係縮喺個town度)

07/ 而甩plan甩得最緊嗰個根本就教授本人,成日唔見咗人,又掛住溝差婆,fuck up晒啲plan,好多時都係靠入面啲人自己搞掂返,好似要去到S4尾阿教授先發揮到佢嘅智慧同領導能力 (但呢個時候小T已經好想佢快啲完)

08/ 成套劇太多分叉的感情線,而又冇乜邊個角色係特別正特別令人鍾意,根本個個都衝動過吳卓曦,比較正係Berlin、Palermo(呢2個藝術家嚟)、廠長(又咸濕又以為自己堅勁)同大肚差婆(勁過Raquel仲要索);老實講,教授同差婆Raquel都幾唔吸引 =P

09/ 教授同Raquel其實只係喺間Cafe度flirt咗幾嘢就愛得咁厲害,臨時演員都係演員嚟,更何況係兵同賊,專業啲好唔好?而差婆喺劫金庫嘅角色其實都幾可有可無,純粹就係變節一個點吧,根據劇情,基本上邊個死/以為死,教授都會咁嬲嬲豬要救吧

10/ 唔好意思,可能小T先入為主,覺得個故事主軸立論唔夠strong嘅話,就咩都好睇,雞蛋裡挑骨頭;不如咁,小T提供幾套覺得好睇嘅,大家參考下,畢竟追一套劇幾廿鐘,追錯咗好慘家嘛~
– House of Cards: Netflix基本要睇吧,白宮政治入門
– The Crown: 拎住BNO嘅你,點可以唔知事頭婆嘅歷史呢,仲話5+1喎,挑~
– Dark: 近期幾hit嘅燒腦劇,建議長期對住official website嘅family trees嚟睇
– Ozark: 講洗黑錢,都好睇,都好人性黑暗下
– The End of the Fxxking World: 短而快,輕鬆又黑暗,爽皮
– Billions: Finance商業劇,識得睇就好好睇