2014年,陳果執導嘅電影《那夜凌晨,我坐上了旺角開往大埔的紅Van》上映,當時口碑毀譽參半,有人話爛尾,有人話太唔跟原著,小說明明係上帽山,戲就話出九龍,所有謎都未解,套戲咁就完咗,戲迷同紅Van迷等了又等,足足6年,終於有消息!

消息指《紅Van》成功入選今屆台灣金馬影展嘅金馬創投會議劇集項目,將會開拍劇集版,預計2021年中播出,由陳果、錢小蕙監製,江皓昕編劇,故事原著作者Pizza會幫手重寫結局。

當中,比較受關注嘅會係其中2個男主角,Shine嘅徐天佑同黃又南,佢哋之前好似係因為政見面不和,仲講咗"No More Shine",不過今次開續集,陳果又話希望用返原班人馬 (當然觀眾都想啦),希望佢哋可以為藝術面犧牲下,破例合作返啦!

《紅Van》一直資金緊絀,有說最後一幕飛車都因為唔夠錢而要變文戲,續集亦完全冇消息;如今要靠外國資金先拍到,都唔知係好事定壞事。電影變劇集,即係長咗,對紅Van迷嚟講係好事,多咗嘢睇,唔駛迫住喺2粒鐘交代晒所有嘢!至於邊度播就仲未知,個創投會議仲有另一套港產劇集,就係由林保怡監製、黃綺琳編劇嘅《心房治療師》,創作團隊係《嘆息橋》原班人馬,睇落似係同ViuTV有關;不過小T最想嘅都係喺Netflix播,配埋英文字幕先可以衝出國際!

好心急!希望可以原班人馬拍到!游梓池、Yuki、發叔、阿信、小巴佬!加油!衝出大埔!時代革命!