「良心小店」系列復活啦!做咗咁耐呢個系列,第一次有良心店邀請小T試食!雖然係咁,但我哋都會如實出食評,大家放心睇埋落去啦~

今次邀請我哋試食嘅良心小店叫Annie Cakelab,主要做芋圓同麻糬曲奇。店主製作嘅都係低糖甜品,啱哂香港人口味。


小T本身好鍾意麻糬,之前亦試過韓國某牌出品嘅麻糬曲奇,中間舊麻糬冇咩煙韌口感,加上朱古力味有小小假,自始就對麻糬曲奇冇咩期望。小T起初都係抱住呢種心態去試,估唔到有驚喜!


今次試食嘅係朱古力麻糬曲奇及抹茶麻糬曲奇 ($36/3塊)。店主用上韓國麵粉、法國牛油、比利時朱古力及3.6牛乳製作。


曲奇上有大大粒朱古力粒,抹茶款一定要夾埋朱古力粒一齊食,否則味道會有小小單調。


店主建議食用前喺曲奇表面噴小小水,再用焗爐低溫150度,焗3-4分鐘左右,或者可用微波爐中低火「叮」1分鐘。可惜小T廚具有限,只係等解凍完室溫咁食。但就算冇跟建議食法,中間舊麻糬都相當有口感,相信大家跟店主咁做,口感會更煙韌。整體嚟講,曲奇就算有朱古力又有麻糬,但都唔會太甜,食咗都冇咁罪疚~


同樣係皇牌甜品嘅有三色芋圓,煮法相當簡單,滾三分鐘就食得。特別想推介大大粒包心款,真材實料,包心入面係軟滑紫薯蓉!食完超滿足。


除此之外,小店仲有芝士奶蓋、雪糕泡芙等等俾大家加購。小T亦試到佢哋嘅芝士奶蓋,好重忌廉芝士味,就咁食都好好食。如果大家都想試吓良心手作甜品,可以睇以下IG:


Instagram: annie.cakelab

文: Zoe