西貢作為香港後花園,以絕美景色見稱,而有靚景嘅行山路線選擇都相對頗多㗎!! 今次介紹嘅地點就喺西貢萬宜水庫東壩,屬於一條比較輕鬆易行路線,一般行山人士或者親子假日郊遊都好適合,欣賞埋世界級地質奇景仲有多個打卡熱點,景色相當壯觀宏偉!

萬宜地質步道喺西貢地區都喺最受歡迎景點之一,位於西貢萬宜水庫東壩,全長大約1.4公里,來回行整條步道需要約1.5 - 2小時。以郊遊路線嚟講交通都算便利,可以選擇由北潭涌開始步行前往,亦可以乘搭專線小巴或的士直接到達萬宜水庫東壩,而駕車人士就要注意,如果想駕車前往就要事先申請先可以。

注意: 沿途並無補給站,部分路途亦較開揚,記得準備要充足水分及糧食,仲要定時補搽防曬以免曬傷! 仲有留意自己能力,更要有同行人士一齊前往,就更加安全啦!! 大家亦要好好愛護環境,帶走垃圾,疫情下更要做好防護措施,保護自己保障大家!


由北潭涌開始步行至萬宜水庫東壩,全程大約9公里,步行大約3小時,路途雖然長但道路平坦,基本上都喺石屎路,風景開揚,沿路不時都會有海景同樹蔭,相當舒服。不時會有牛經過,千祈唔好隨意餵食或者騷擾佢地休息,不過就小心地面有唔少「牛屎地雷」喇!


見到大大個藍色萬宜水庫紀念碑,就喺東壩入口喇!! 壩頂景色十分廣闊,有無敵大海景環繞,冇遮擋嘅環境下仲有種被天空包圍住嘅感覺,遠望亦可以觀賞破邊洲景色。


如果想挑戰花山近距離睇破邊洲,詳情可以睇睇呢條路線 -> https://timable.com/blog/1900022



由壩頂慢慢向前行及至壩底,沿途景觀極為壯觀,可以欣賞各種因為億萬年前火山噴發而成嘅世界級地質奇觀,有世界級六角形岩柱,S型岩柱相當特別。



身處各種巨型岩石下頓時覺得自己顯得非常渺小,整個景觀的確極為震撼。請留意,岩石邊雖然只有矮石壆,但都千萬唔好爬入去,一來有機會會有碎石滾下形成危險,二來更要好好保護環境。


壩底盡頭就喺海蝕洞,喺多年來由大浪衝擊侵蝕而成嘅,近年興建咗木步道,可以近距離觀看海蝕洞,聽住水滴聲非常療癒。


圍著水壩邊嘅巨型防波堤,都喺東壩特色之一,吸引唔少人前往打卡,不過防波堤唔喺固定裝置,有鬆脫機會,所以唔建議大家爬上去影相喇!


前往路線
路線1: 北潭涌步行前往東壩
乘搭由西貢市中心開出的嘅94號巴士 / 由鑽石山港鐵站嘅96R巴士(只在週末及公共假期行駛),喺北潭涌站落車的話,會有士多及公廁; 如果無須補給,可以喺下一站,即喺上窰站落車,會比較近,之後沿大網仔路前行至分岔路口,靠右沿西貢萬宜路繼續步行就可。

路線2: 乘搭專線小巴或的士直達東壩
假日前往的話,喺北潭涌可乘搭假日行駛新界專線小巴9A號線往返北潭涌與萬宜水庫東壩之間。回程乘搭呢架小巴返回北潭涌亦相當方便,但要留意服務時間,只有3pm - 6pm行駛 (逢星期日及公眾假期服務),班次大約20 - 25分鐘一班。

選擇的士嘅話,可以由西貢市中心或北潭涌乘搭的士直達東壩,如果回程都想乘搭的士嘅話記得同司機事先約定回程時間喇!

路線3: 參加導賞團
想參加由火山探知館舉辦嘅導賞團,可以留意官網詳情及報名細節。東壩半日遊收費導賞團逢星期六、日及公眾假期舉辦,由位於西貢海濱公園嘅火山探知館乘專車出發,由導賞員喺車上講解,到達後可以自行參觀東壩,並有專車回程。疫情期間導賞團暫停舉辦,想知道最新消息,就要留意官網喇: https://www.volcanodiscoverycentre.hk/index.php?lang=zh


全長: 由北潭涌步行前往萬宜水庫東壩約9公里; 萬宜地質步道全長約1.4公里
難度: ★★✩✩✩
需要時間: 由北潭涌開始步行至東壩約3小時; 萬宜地質步道來回2小時


撰文: HL