為人熟悉嘅欣澳除咗迪士尼同迪欣湖之外,仲有個絕美郊遊景點——人稱港版小豆島天使之路嘅長索島。週末想去遠少少郊遊,又唔洗行山太辛苦,打卡同時可以呼吸下新鮮空氣,呢度就最適合新手輕鬆玩喇!!

長索島位於大嶼山北部陰澳灣,喺一個無人島,潮退時會出現連島沙洲,將鹿頸村與長索島連起來,從而形成咗同日本天使之路十分相似嘅景色。記得出發之前參考下天文台嘅潮汐預報,睇啱時間先去就比較穩陣喇!
潮汐預報傳送門: https://www.hko.gov.hk/tc/tide/predtide.htm

圖片: Instagram @suki_s_li

前往長索島路程簡單,由欣澳港鐵站出發(面向海向左邊行),沿著海濱長廊行大約半小時,右邊可以一直欣賞陰澳灣沿海風景,吹住海風前行相當舒服。海提以外嘅陰澳灣,海中豎立咗數十支木樁,都喺其中一個景點之一,據講以前喺香港唯一嘅水上儲木場,呢啲木樁就喺用嚟承載浮木嘅,依家已經荒廢咗剩低一支支水上巨木,令景色別有一番風味。

圖片: Instagram @suki_s_li

大概行到去海濱長廊嘅盡頭喺陰澳石灘,就可以靠右有條小路進入,一路前行就可以到達鹿頸村。鹿頸村喺大嶼山一條新界原居民嘅鄉村,依然會有居民/漁民居住,所以入到村內影相時,記得要尊重地方,唔好騷擾居民日常生活啊!

圖片: Instagram @gelannccy_

圖片: Instagram @gelannccy_

一進入鹿頸村有個木棧道碼頭,海面有一排浮木通往碼頭位置,唔建議遊人使用浮木,因為容易有危險呢! 不過都有唔少人會選擇喺岸邊打卡,影低呢個特別嘅景色。

圖片: Instagram @suki_s_li

鹿頸村仲有鹿頸碼頭,有個小燈塔,都喺另一個打卡位!

圖片: Instagram @tibby_chiu

之後就去到是次郊遊重點長索島喇!! 呢條連島沙洲雖然對比日本嘅天使之路喺短好多,不過香港嘅景色都有值得欣賞嘅地方,陽光充足天氣好嘅時候,影相都一流㗎!

圖片: Instagram @suki_s_li

圖片: Instagram @lululoooo

附近仲有個掛喺樹上嘅鞦韆,面向海邊玩,夠哂仙氣! 有啲朋友鍾意挑戰難度,會選擇圍住長索島行一圈,想試嘅朋友要量力而為,始終長索島島上並沒有正規路線提供,環島時要走過凹凸不平又充滿青苔嘅岩石涉水而行,非常濕滑難行,如果冇合適行山裝備同經驗,就唔好隨便嘗試啦! 長索島環境開揚,清澈水面更會倒映出金黃色落日,推薦大家睇埋日落先走,為呢次旅程畫上一個完美句號。

圖片: Instagram @suki_s_li

記得要有公德心,小心使用公共設施,唔好破壞佢地,咁就大家都有得享用啦!! 仲有要好好愛護環境,自己垃圾自己帶走,疫情下保持衛生,戴好口罩,保護自己保護大家!!

地點: 大嶼山北部陰澳灣長索島
前往方法: 欣澳港鐵站A出口步出後,面向海向左邊行,一直沿著海濱長廊行走,及至陰澳石灘後再經過鹿頸村即到達長索島
時間: 來回大約2.5小時


撰文: HL