疫情爆發至今都接近兩年,即係話大家接近兩年冇去過旅行,真係好掛住可以去旅行嘅日子。冇得出國唯有喺香港食好啲,今次就為大家推介5間日式料理餐廳,可以去止吓思鄉癮之餘,仲可以打卡,而且食物質素都相當唔錯,即刻睇吓有咩好推介啦!



1. 復古和式輕食cafe

相信各位鍾意打卡嘅女士,都會留意呢間人氣高企嘅和式輕食料理餐廳。餐廳內以懷舊木系設計,每一張台都有乾花作為擺設,啱晒鍾意影相呃like嘅女仔啊!作為打卡cafe,又點可以只係注重裝修呢?餐廳嘅食物質素同樣高,色香味俱全,每道料理嘅擺盤都好精緻,女仔一個人食啱啱好。而且飯團同埋特飲都整成富士山嘅形狀,非常吸睛!食飽之後亦都可以喺店內行吓,店內有婆婆雜貨店,售賣各種日式風情精品。出返嚟之後,真係好似去完一轉日本,買埋手信先返嚟香港一樣。如果想去感受吓日本嘅風情,就記住早啲上網預約啦!


婆婆珈琲屋
地址:尖沙咀彌敦道176號The Nate 一樓全層
時間:上午9:30 ~ 下午6時
電話:9675 1438
https://www.grandmamacafe.com



2. 日式家庭料理

黃埔站開通後,就開咗越嚟越多餐廳,人流都多咗唔少。而今次介紹呢間和式家庭料理餐廳,雖然唔係打卡cafe,但長期都非常多人排隊,無半個鐘以上都唔會入到去食,小編今次就親身去試吓係唔係真係咁好食啦!

首先講吓冷盤先,味道正常,但冇乜特別。「醬油蛋飯」呢個配搭應該唔會太差,但可惜珍珠米飯落得太多水,太過軟身,而且蛋味唔夠香濃。各款主食嘅味道都唔錯,「紅酒汁煮牛肋條」燜得軟淋入味,「南蠻炸雞」夠脆口,配上特製醬汁,酸酸甜甜頗為開胃。值得一提嘅係,暖配菜「蔥燒牛舌」食落好有驚喜。厚薄啱啱好,而且夠入味,配上蔥燒更加惹味!食完之後,真係會有溫暖嘅感覺,而且仲非常之飽,女仔細食嘅話,可以選擇同朋友一齊share~


米気
地址:紅磡黃埔天地百寶坊(第3期) 地下G32號舖
時間:中午12時 ~ 下午10時
電話:3543 1101



3. 懷舊冰室

呢間位於土瓜灣嘅復古懷舊冰室,入面放滿懷舊嘅裝飾及擺設,有舊式家庭撥輪電話、大頭佛及舊玩具,整體風格而木材為主,而頭頂亦有三葉吊扇、懷舊吊燈及單車等。餐廳內360度都係打卡位,預留半日喺入面影相一啲都唔過分!

食物方面係傳統日式料理定食,主打日本沖繩縣嘅石垣黑毛和牛,入口軟嫩,充滿牛肉嘅油脂香。定食包含前菜漬物、麵豉湯及主食。可以打卡之餘,食物嘅CP值都好高,二百蚊都唔使就可以食到日本和牛套餐,非常抵食!


呼吸星球
地址:土瓜灣馬頭角道91號地舖
時間:上午11時 ~ 下午10時 (周四休息)
電話:2771 7775



4. 環境清幽露天cafe

咖啡店位於「618上海街」,為戰前二級歷史建築活化而成。餐廳最大嘅特色係可以選擇戶外用餐,露天cafe 環境舒適,旁邊有唔少植物添加生氣。怕熱嘅客人可以選擇室內用餐,餐廳內嘅牆壁有人手繪畫嘅壁畫,好有風格!有藤椅座位之餘,亦有榻榻米,充滿日本風情。

餐廳主打「一汁三菜」及招牌班戟,「一汁」指1份湯品,「三菜」指1道主菜及2道配菜,主食有5款可供選擇。而招牌班戟有伯爵茶同桂花兩種口味可以揀,伴碟有粟米片及水果,賣相不錯。而且入面有煙韌軟糯嘅麻糬,配埋奶蓋同雪糕,一凍一熱好過癮!



蟲二
地址:旺角上海街618號頂樓
時間:上午11時 ~ 下午10時
電話:N/A



5. 健康抵食料理

餐廳內以簡約木系為設計,坐得舒適。牆上嘅餐牌用手寫風嘅字體印喺木板上,好有日本風情。餐廳每日都有不同嘅精選菜式餐單,最抵食嘅套餐只需要$80,可選三款料理,再配白飯或沙律,跟一杯指定飲品。「明太子玉子燒」賣相吸引,而且份量十足。「茄子豚樂燒」好惹味,醬汁滲入晒茄子入面,味道濃郁。


一木小料理
地址:灣仔廈門街27號地舖
時間:中午12時 ~ 下午10時 (下午3時~6:30 中場休息)
電話:2687 2080

撰文:Athena