各位準備拯救Oz世界嘅勇者, 現在就可以行動喇! Timable一如上年, 為大家率先披露今年Hello Kitty in Oz - The Lost Chapter展覽究竟有乜野, 等會去嘅人可以plan定條玩盡全場嘅路線, 又可以引誘下d仲諗緊去唔去嘅人, 至於果d死都話唔去嘅人, 你睇埋篇文至講啦! :D

好, 等我簡短咁介紹一下呢個展覽。其實呢個展覽係第4屆Sanrio展覽, 即係除左Hello Kitty之外你仲可以見到其他Sanrio公仔, 例如超sweet嘅Little twin stars、好可愛嘅玉桂狗, 仲有為配合今年「森林」嘅主題, 由平時係唔識飛嘅企鵝變身烏鴉嘅X.O.等等。今年Hello Kitty展又搬返去KITEC喇! 對第一次去嘅小記而言, 一入場已經覺得大到都唔知由邊度開始玩起! 配合森林主題嘅裝飾都非常精美, 小記影完左面嘅稻草人屋, 又想入去獅子森林睇, 點知同行嘅黑莓又同PR姐姐行左去好巨型嘅鐵甲人間屋, 真係花多眼亂!


今屆展覽希望入場嘅觀眾, 化身成拯救Oz世界的勇者(稻草人、鐵甲人、獅子, 入場時隨機分配), 攞住隻Hello Kitty遊戲裝置, 入去玩曬7個關卡遊戲, 加上與「同類」嘅勇者結盟賺額外積分, 就可以憑分換配件同Hello Kitty遊戲裝置「裝身」喇! 自問自己都唔係呢隻無嘴貓嘅粉絲, 但小記睇過d配件實物襯o係Hello Kitty遊戲裝置上面又幾靚喔, 玩完放呢隻連配件嘅裝置o係屋企都好靚呀!


左上: 場內有幾個印章機, 印出來唔係普通嘅墨水印, 而係凹凸印!
右上: 其中一部結盟機, 只要o係場內搵到個相同角色嘅勇者, 放兩個遊戲裝置o係機器適當位置, 就可以換取更多額外積分喇
左下: 用來check積分嘅機都特別靚lol
右下: Hello Kitty遊戲裝置! 個靚靚紫色蝴蝶結就係積分換返來架

今年嘅遊戲關卡唔同上年, 可以不分先後次序玩, 見到邊度少人就玩左先喇! 每個遊戲只係可以玩一次, 部分遊戲程序簡單, 不過唔知力度同唔熟場地玩起來都幾複雜, 所以記得要睇清楚遊戲玩法先開始呀! 以下等小記一一話比大家聽個別遊戲有乜要注意啦!


遊戲1: Corn House [上圖左]
隻手o係堆火柴上撥撥下燒粟米, 仲要係燒好卡哇伊嘅粟米~ 記得要慢慢撥, 因為個sensor都幾敏感, 一撥得太快就會燒焦左條粟米, 咁就當輸一分都無架喇! [小記影相呢下仲燒得好靚, 下秒就燒焦左喇...]

遊戲2: Wood Factory [上圖右]
好簡單, 見到幾多條線就劈幾多下, 見到花花就唔好劈。小姐們記得唔好太輕力, 會sense唔到架! 男士們又唔好太大力, 因為會fail, 當你輸架!


遊戲3: The Warehouse [圖上]
要抱住隻半個人咁高嘅Hello Kitty公仔, 避開農夫嘅Sensor眼, 用公仔手入面嘅sensor拍台上嘅sensor當拍熄個鬧鐘, 然後返去起點。記得聽清楚農夫醒嘅時候嘅聲, 比佢醒左即係sensor開左, 咁你就要用d障礙物避開喇! 隻公仔設有大人同小童size, 非常細心!

遊戲4: Tin Man’s House [圖左下]
o係開始遊戲嘅時候留意pattern, o係附近廚櫃上搵返個pattern, 敲幾下認住發出嘅聲, 然後走到屋嘅另一面o係部機度認返個聲出來。個人認為呢個遊戲好難玩, 一來無貼士底下好難搵到個圖案, 二來到時好多人就可能會聽唔到個聲, 甚至行到過去部機度都已經唔記得個聲...

遊戲5: Kuromi Tent [圖右下]
你好記性嘅話玩呢個遊戲真係會屈機。好簡單, 記住六張牌嘅先後次序, 然後順序拍返出來。小記記性麻麻, 唯有同黑莓每人記三個, 但都要玩多幾次先贏到… 建議大家記牌上一d特徵, 例如太陽, 月亮等等。

遊戲6: The Dark Forrest
行經一條好黑嘅路, 遊戲開始時就對樹上紅燈亮起嘅眼大聲吼一下, 個燈熄左就得喇! D燈嘅距離都幾遠, 大家一整熄左一個燈記得要快身後轉!
(個森林太黑,落閃燈又冇晒feel,唔出相,自己來睇啦~)


遊戲7: The Last Chapter [即係打大佬!]
注意入左翡翠城部分就無得返轉頭架喇! 記得玩曬以上6隻game, 搵人結埋盟先好入去! 上左去呢個巨型Hello Kitty頭嘅台之後, 就可以玩最後一隻game! 玩法好簡單, 對住個好似俄羅斯方塊嘅巨型螢幕, 見到字母就推下個掣, 亂碼就唔好接, 就係咁簡單。特別之處係可以居高臨下對住個巨型螢幕玩game好特別, 加上四周巨型嘅裝飾, 突然覺得自己細粒左好多, 無咁大份… 哈哈!


其實大家如果唔想玩遊戲, 都可以買普通門票入去睇下靚景影下相, 兼買限量版Sanrio精品! 除左一入場就即有精美多用途袋送, 如果o係限時完成遊戲離開Oz世界仲會有特別版信封同圖章貼紙送添! 另外, 7月26日同8月2日都係Big Hat Day! 只要你o係入場前展示你嘅Big Hat [size大過 15cm(高) X 20cm(直徑) ] 就可以獲得別注版postcard架喇!!

睇玩係咪好想親身去玩呢? 展覽詳情就要留意o係我地網站嘅事件喇!

「Hello Kitty in Oz - The Lost Chapter」展覽在Timable的事件:
http://www.timable.com/event.php?eid=41751

編者按:
冇咀貓呢年鬧到滿城風雨,估都估唔到Hello Kitty呢個名會上港聞版,"被接受"政治任務拆僭建炸彈,七一遊行,港人戥佢唔抵,話思歪"冇咀都屈",齊齊為Kitty平反,仲"傳聞"Dear Daniel唔鐘意佢同思歪有路,提出分手云云.

得啖笑吧~ 不過家陣香港真係滿城盡是冇咀貓,港聞完了,到老麥賣貓,之後又到了年度Kitty展! Kitty貓已經無孔不入,滲透左我地o既生活. 黑莓身為港男,冇奶油會like呢隻貓. 不過,經過2年o既採訪,都不得不佩服日本人o既細心同用心. 所以,各位港男,如果你有幸陪女友黎睇Kitty展的話,除左要忍住個銀包赤赤痛之外,都可以欣賞下呢個展o既details,我相信總有一兩野會令會心微笑一下.

Timable特約記者: Cyder
編輯/攝影: 黑莓