可愛動物冬甩Cafe X 日式雜貨店

author: Timable, 19 Oct 2015 (Mon) 5:39pm


聞說屯門有個舊屋邨商場翻新咗,仲改埋個名叫H.A.N.D.S。本來諗住又係領X旗下嘅場,應該都係引入一堆大Brand或連鎖店塞爆個場就算。典知有日入開屯門搵大姨媽飲茶,順手一逛,竟然係非一般嘅領X場,甚少大Brand或連鎖,都是小店的多,OK 喎,終於唔是倒模場!雖則唔算大,你話如果唔係約咗大姨媽飲茶要山長水遠入到屯門行又真係未必超化算,但都算是近年少見有啲Heart嘅小店新場。當中較吸晴的是呢間Aqua Plaza!等小篇輕輕介紹一下先~


Aqua Plaza原先喺荔枝角D2 Place有間Shop,早已經獨家限量發售由日本日日新鮮運到嘅Ikumimama Doughnuts可愛動物冬甩,全部都是人手製造,隻隻都獨一無二嫁!今次屯門開新店,仲設有一間小Cafe堂食!立即變文青即得,得咗!



Cafe供應和風意粉,遲啲仲有小食、沙律、湯麵供應。當然暫時嘅主角係Cute Cute冬甩。冬甩除咗個樣夠呃Like之外,仲強調以健康食材製作,用咗無激素雞蛋同有機大豆,咁就食得開心又放心。至於食落甜甜就好視乎你同邊個食嫁啫,配一杯Latte套餐價盛惠$48,平過星巴巴啦!不過人哋小店就唔好坐人哋4粒鐘啦,食夠飲夠嘆夠就好起身行下買下喇喂~


同D2 店一樣,都是賣少女服裝、精品同懷舊糖果。啲少女服裝好少女,如果唔想個個出街都係著Uni乜,可以考慮...叫男朋友俾$,正所謂「女為悅己者容」嘛。啲懷舊糖果好有特色,幾蚊雞都有交易,樣子夠晒Vintage又可愛,不過睇落都應該係色素加化學嘢,作為有機文青,咪食呢啲嘢啦,睇夠就好,唔買較環保。




多謝大姨媽請飲茶先發現到呢間Shop,個場算是少蝗,比屯門市廣場少很多,週末來一趟吃隻Cute Cute冬甩飲杯Latte自拍upload放閃,都是一個拍拖好節目。Between,呢個場冇美帝主義星巴巴,感覺本土。


============
Aqua Plaza
屯門友愛邨H.A.N.D.S shopping mall 地下S120鋪

文/編/攝: 黑莓