今个星期气温骤降,夜晚食咩好?梗系烚下烚下暖笠笠最开心啦!之但系,打边炉呢家嘢,一楼都系多人性活动。临时临急Call friends出来打,唔系话要拍拖就话阿妈煲咗汤,唔通连诗雅都唔钟意我呀?唔通单身毒L真一条原罪?唔怕喎!由于小编乃一个不节不扣但又自得其乐嘅慢性毒L,当然有好嘢益大家啦!今次拣来毒L边炉(即一人火锅)界嘅「逼科」(Big Four)大比拼,分别有大家X、大快X、吉野X美X,详细逐项比拼,等各位可以毒自打边炉都可以食得醒过人!

正所谓「逼科」呢家嘢系人哋叫嘅,唔似得某乐坛组合走去自称嘅。今次拣嘅「逼科」,系基于小编印象中大家X是4间之中好多年前首间引入毒L边炉嘅(如有错,讲指正)。而小编几年前仲开咗个冇人like嘅unofficial FB fan page讲大家X毒L边炉;之后吉野X将之发扬光大普及化;至于另外2间,因为渠哋都多分店吧,总有一间喺左近,方便大家选择。如果民间各区有其他小店卧虎藏龙卖毒L边炉,请提供资料,但今次大比拼都系比较返大家就脚嘅「逼科」,等大家一条友一时之间边炉瘾起都可以快快手搵到间救火。

比拼分几个方面,有汤底、牛肉、配料、火喉、饮品等等,由于个个Menu唔同,而次次出品嘅品质都会有啲出入,所以只能做到尽量公平。当然,食评呢家嘢梗系有主观成份啦,读者可以自行判断喔。但可以肯定嘅系,呢篇绝无广告成份喔~唔好讲咁多,开炉!

Round 1 - 汤底
大家X: 猪骨浓汤 / 番茄薯仔汤 / 沙爹汤
大快X: 胡椒咸菜汤 / 番茄薯仔汤 / 惹味麻辣汤
吉野X: 日式浓汤 / 野菜清汤 / 咖哩汤
美X: 日之清菜汤 / 日之酱油汤 / 日之味浓汤
(每间第一个为小编所选之汤底)

选择方面以大快X较为吸引,是唯一一间提供麻辣的,不过小编选了胡椒咸菜汤因为好似几特别,都几有胡椒咸菜味。另推介吉野X嘅日式浓汤,很有日式すき焼き嘅味道!但除咗汤底本身,有样嘢是必定会做而又好紧要的—加水!呢样嘢,吉野X最细心,3只汤底有3壶唔同汤底比你自己加,唔怕沟淡原先个味,值得一赞!其余的都是清一色同一壶水/汤,加加下就好似拍左拖十年嘅男女朋友咁,淡晒lu~所以呢一Round嘅得分系

大家X: 5 | 大快X: 8 | 吉野X: 7 | 美X: 5

大快X


==================================

Round 2 - 牛肉
众所9知,牛肉好毒,而且又是边炉主角,所以最啱毒L打边炉食。其实4间一般都有猪/鸡比啲冇咁毒嘅人拣,不过小编为求公平,都一致拣牛,实行由头毒到落尾,搞到小编为咗写呢篇文仲毒过之前。至于是咪所谓嘅谷饲牛就算吧啦,都唔多食得出嫁啦,主要系睇多唔多白色嘅肥膏啦。就小编食嘅嚟讲,大快X较少肥膏,又卷到一圈圈好似以前去那间劲贵嘅强国小肥X一样咁醒神。至于大家X同吉野X就用一个胶盒封埋保鲜纸好似好卫生咁虽则唔环保。讲味道就,老老豆豆,都系嗰句,几廿蚊,比和牛你食咩,都系但求肉有肉味滚十秒食得就可以啦。得分系

大家X: 6 | 大快X: 8 | 吉野X: 6 | 美X: 5

==================================

Round 3 - 配料
配料即系牛肉以外用来滚嘅材料,一般系丸类、海鲜、豆腐同菜。呢样大家X较出色,有炸鱼皮,又有鲜肉丸,海鲜有只帆立贝、虾同多咗2嚿鱼,加$5仲有个鱼滑,呢个必加!吉野X大家都食惯了,都是蟹柳、豆腐、南瓜、大白菜等,而主角是那嚿芝士竹轮,好食但要小心入面啲热芝士爆出来烫亲个咀仔;整体就同美X差唔多,冇大大棵生菜比你滚,比较日式。大快X唔包菜以外嘅配料,要另外加钱。得分系

大家X: 8 | 大快X: 5 | 吉野X: 6 | 美X: 6

大家X


==================================

Round 4 - 炉火
食神滔滔易Fat 喺广告入面都话打边炉最紧要唔系啲料,系个炉呀!记得好多年前大家X打边炉嗰时个火只系一点火,等成世煲汤都唔滚,但就等到自己火滚!多年后而家个火已经进化成3点式火,快滚咗好多;个炉火就其实4间都差唔多,但当中小编去吉野X嗰间新装修嘅分店竟然系用电.磁.炉!呜呀~仲要系嵌咗入张枱入面的!唔讲仲以为上手漏咗部iPad冇攞走添呀...火力之猛,前所未有,可校大细,十分爽皮,唔舍得走,好想过对面百X买嘢加料丧打~不过边间有电磁炉就等你哋自己发掘喇,除非渠比广告费我啦~得分系

大家X: 6 | 大快X: 6 | 吉野X: 8 | 美X: 6

吉野X


==================================

Round 5 - 饮品
打边炉实会口渴,尤其系食辣嘢,以前年代边炉跟嗰杯嘢饮同平时食叉饭嗰杯嘢大细冇分别,咁又点会够喉呢~而家进化咗了,跟边炉的嘢饮通常系重量级,大杯咗好多,都够救下火!但一般都要加钱先有,得吉野X唔驶加钱都有。不过加钱先有嘢饮有好有唔好,好嘅当然就系抵啲唔驶比多几蚊,唔好嘅就系如果唔包嘢饮,毒L们就可以过对面7仔买返罐啤啤啤渠!唔敢?未试过?好明显你唔够小编毒啦~放心喎,小编饮咁多次都冇人话嫁喎~咪话我话醒你~至于唯一一间有得吃麻辣嘅大快X就反而冇嘢饮送又冇加大装降火饮品,要扣你分喔~得分系

大家X: 6 | 大快X: 5 | 吉野X: 7 | 美X: 6

美X


==================================

总分
大家X: 31
配料出色,值得一吃

大快X: 32
汤底不错,点都要试

吉野X: 34
包埋嘢饮,识食之选

美X: 28
中规中矩,可以一试


总评
就咁啦,其实好唔好食,啱唔啱食,见人见智。不过,单身边炉伤身呀~最好,快啲搵返个Partner同你一齐打边炉啦~就算2个人又系食返呢4大毒L边炉,嗌2份,个味道都会完全唔同晒嫁~唔信?试下啦!毒L们,共勉之,阿们!

后记
话说小编OK大食,俱俱一个一人火锅又典够禾顶一晚。于是,其实每一次小编食毒L火锅前都会准备一包后备乌冬喺个毒L背囊入面,唔够饱就拎出来滚埋渠,巧满足猪。写呢篇文那一次去吉野X,对面搭枱情侣的女友见小编拎包后备乌冬出来滚就同男友窃窃私语笑(8+1)小编(8-1),其实我听到啰,下次再大声啲吖~我心諗,你条仔又会够饱啦,而渠明知唔够饱又唔识做好准备或者当场再叫extra乌冬先系(8-1)啦~加个乌冬成$10~对面759 $10几多包你知唔知呀~土地问题有几严重你知唔知呀~Um...我諗...男人一生,除咗要寻觅一个肯同自己睇Clockenflap嘅女人,仲要寻觅一个肯同自己去吉野X打边炉自备乌冬嘅女人啰~

文: 毒L美食专员 黑莓