伊藤润二展览香港站 有咩位必睇?

作者: Timable, 2017年2月6日 (一) 下午3时28分


身为伊藤润二忠实粉丝嘅小T,见到之前台湾有展览真系十级葡萄!不过而家小T唔使羡慕妒忌恨喇!事关伊藤润二恐怖美学体验大展香港站将会喺今日(2月6日)开幕,小T噚日仲去咗优先场添~


一去到PMQ正门就见到大大块backdrop,上面仲有两个人型气球飘飘下,一睇就知系影相打卡位啦!

向前行就开始伊藤润二恐怖美学体验之旅~~一入场首先系AR实境展区,戴上现场提供嘅AR眼镜,你就会发现一个又一个熟悉嘅漫画人物竟然识郁!!耳边仲不时传嚟惨叫声!!真系够晒气氛,忠实粉丝表示好满意~~


下一个展区就系由世界级恐怖少女富江睇场!全裸半浸喺水入面嘅富江,真系好…好靚呀~~(喺FANS眼中应该睇咩都觉得靚)墙上面仲有一幅伊藤老师同无限复活嘅富江嘅合照!另外场内亦有一位富江cosplayer,等大家可以真实感受到富江嘅恐怖美~呢个展区嘅另一面就系香港特别展区。制作团队巧妙咁将伊藤老师嘅作品同香港街头结合,系全球独家㗎!



之后就到魔之碎片原画手稿展区。原画喎,手稿喎,一生人有几多次机会可以亲眼见到恐怖漫画大师嘅手稿?今次唔睇就冇㗎喇,记住落足眼力细心品赏!(题外话,有几多人同小T一样,见到《鬼木宅》嗰间屋就会成身起晒鸡皮?)


登登登櫈!系成日含钉嘅双一呀!虽然渠性格古怪又钟意诅咒人,但小T真系觉得渠好得意~所以一见到有双一cosplayer就即刻走去影相,不过影嗰阵有少少惊渠会用个锤仔嚟打我……


最后必玩人头气球拍照亭,将你个样key落人头气球度!温提:部机会影3次,记住块面要对正个圈圈,同埋个样有咁恐怖得咁恐怖,咁先衬返成件事㗎嘛系咪~


走嘅时候当然唔少得买纪念品啦,种类都算多,胶纸去到T-shirt都有!小T就推介双一成口钉口罩喇!


【伊藤润二恐怖美学体验大展】
香港站
日期:2月6日至26日

时间:10am - 9pm

地点:中环 PMQ 元创方

更多详情:http://timable.com/event/1249291