无印良品超简约小屋 港币20几万就买到?

作者: Timable, 2017年4月25日 (二) 下午1时40分


无印良品嘅产品出咗名够简约就系人都知,最近日本无印就捞过界,推出「无印良品小屋」(Muji Hut)计划,积极向家居设计发展!而成品亦都终于面世喇!睇落真心高质喎!


贯彻返一向简约作风,无印以「在乡村小屋中生活」为概念,喺日本千叶县白滨校舍进驻推行第一波实体屋。可以瞓喺大草原上面,一起身打开门就系对住个海嘅感觉…我哋呢啲上唔到楼嘅废青,都系唔会明㗎喇,呜呜!


虽然屋仔细细,但系就五脏俱全,应有嘅家俬都有齐。屋身使用100%国产杉木木制成,仲用上日本传统技术建成,绝对唔使惊系豆腐渣工程。听讲无印仲打算喺嚟紧秋天公布其他嘅进驻地点添!


睇返个价钱,一间无印小屋要300万yen,计返其实即系港纸20万多啲。呢个价喺香港都唔知买唔买到一格地板……嗯……冇咩事小T都系出返去睇下几时有平机票去日本先喇。上楼?咩嚟㗎??

资料来源:Muji Japan
http://www.muji.com/jp/mujihut/