《拾伍年开光大典》艾粒-专访阿奴阿占

作者: Timable, 2017年4月25日 (二) 下午4时31分

事隔一年,艾粒再次合体开骚,仲话咁快宣布爆满要加开两场!问到点解今次个骚叫做《开光大典》,阿奴就抵死咁答:「阿占之前搵咗个大师,咁个大师就赠咗渠个字:开!」阿占续说:「既然渠畀咗个开字我哋,咁我哋就喺度諗:开咩好呢?开光好似几好喎。」阿奴解释:「开光呢两个字其实系好香港,开咗光就好似畀到新嘅生命力畀大家,咁我哋艾粒一直都系将欢乐带畀观众,所以就拣咗开光大典做个骚名喇。」听讲到时艾粒仲会喺现场即席拎啲神水同观众开光,大家可以密切期待下!


艾粒仔咁多年嚟试过扮演唔同角色,由初出道嘅巨型假发,去到近期嘅韩风路线,渠哋都完全carry到有余。问到点解今次会系做神仙,渠哋就咁样样答:「神仙路线好似冇人做过,既然我哋都扮过咁多嘢咪试下啰。」不过当小T问到如果渠哋真系有机会做真﹒神仙嘅话会想做咩神,渠哋居然异口同声答:「咸神!」喂呢啲是咪叫做默契十足呀?

创作新角色 要向前看
每次艾粒开骚都会推出一首主题曲,而今次首新歌就叫做《无人完美》,MV入面仲出现咗好多以前嘅角色,好似娜娜奈奈、阿叮阿雄等等。咁系咪即系暗示今次个骚可能会出现呢啲复刻人物呀?「暂时冇諗到呢一步。好多人都问我哋会唔会玩返以前啲嘢,应该就唔会喇,玩过啦嘛!」咁咪冇得重遇Dicky仔啰,呜呜。

众多经典角色 最爱系…?
阿占说:「其实扮得都钟意嘅,不过近期我最钟意就系喺ViuTV黑料理节目入面一个叫做J蟹嘅角色,因为我唔使再扮女人,可以做返男人,仲要系一个好疯狂嘅男人。」睇嚟阿占心底里都好渴望做返一个真正嘅男人!而阿奴亦都话渠近期最钟意嘅角色系一个大只佬喎:「因为我哋最近帮《银河守护队2》电影拍咗条宣传片,我要扮戏入面嗰个光头大只佬,用低成本嚟cos呢个角色,都几好玩。」

各自修行定同枱食饭?
「合体有两个脑一齐运作,当然会多咗好多idea。而且零压力,做得好两个一齐背,做得唔好就赖对方。但系自己solo开骚,无论系好定唔好都要自己一个背晒。」话虽如此,阿奴觉得其实有时都应该要分开下:「自己出去搵到啲好玩嘅嘢先可以同拍档分享㗎嘛!我自己都几enjoy之前搞嘅个人show,可以做到平时冇机会做嘅嘢,系一个新嘅自己。」阿占:「各有开心同唔开心啦,一个时段合体,一个时段又分返开,我觉得呢个拼盘系最好。做死一样嘢好闷㗎嘛~」


15年嚟嘅相处之道
「我哋嘅相处之道咪就系唔相处啰!」阿奴霸气地说。「两个人易夹啲嘅,放咗工就唔搵对方㗎喇!」咁即系剩系会倾公事?「我唔方便讲咁多喇!」咦咦睇嚟长寿组合唔系咁易做呀下…小T都系唔方便讲咁多,55。

未来幻想合作对象
艾粒同do姐无论系电台定电视节目都合作无间,擦出唔少火花。问到渠哋将来仲有冇想合作嘅对象,阿占个答案竟然系…「同到do姐合作已经系一件好疯狂嘅事,下次再合作可能要搵影帝林家栋喇。」阿奴就话想同喺香港出世嘅外国人合作:「有啲南亚裔同印度朋友,渠哋喺香港出世,反而可能比我哋更加了解香港,我觉得都几有趣。」

重新推出改词歌?
艾粒初出道嘅改词歌可称为渠哋嘅代表作之一,就算去到而家,唱K嗰阵都总会有啲朋友点嚟唱。但问到渠哋会唔会再出改词歌嘅时候,渠哋竟然话可一不可再呀!阿占话:「而家好易畀人闹㗎!阵间改咗只歌出嚟畀人无限上纲,咁就惨喇。」阿奴说:「都会照改嘅,唔出得街啫…」睇嚟以后想听到渠哋出新改词歌都系无望喇,鸣!

艾粒电视台重现无望?
小T相信好多人都期待渠哋会拍返艾粒电视台,但阿占就话冇打算推出新一辑呀!「其实艾粒电视台已经化身咗喺ViuTV黑料理呢个节目入面,都有啲趣剧㗎!不过如果你问我哋会唔会拍返艾粒电视台,咁我諗你哋都系睇返旧嗰几套算喇。因为出新一辑dvd要钱,我哋未筹到旗呀!」渠仲呼吁大家唔好睇咁多艾粒电视台:「睇咁多会影响个脑㗎!Move on啦大家!」

创作一个角色形容80后90后
艾粒「扮嘢」咁叻,叫渠哋创作一个角色去形容而家8、90后,又会系点嘅呢?「我会放好多电子科技嘢喺身上面」阿占说,「而家咩都讲智能,成身都系high tec嘢㗎嘛!」而阿奴就话会创作一个好快嘅人:「无论系80后定90后,生活喺呢个资讯发达嘅年代,你啲手指要郁得快,眼又要睇得快。最惨就系连瞓觉都好快醒吖嘛!」小T呢个90后表示完全讲中晒,尤其是瞓觉!

介绍返,其实小T读书嗰阵都系艾粒粉丝嚟㗎!所以今次访问都问咗好多私心问题(想睇更多可以上Timable Facebook:http://www.facebook.com/timable.hk/)諗返起当初钟意渠哋嘅原因就系因为睇得开心,带咗好多欢乐畀我。一个搞笑组合可以喺香港咁多年其实唔容易,希望艾粒呢条搞笑之路可以一直行落去。


艾粒《拾伍年开光大典》on Timable:
http://timable.com/event/1414602