搭港铁都有得打卡?深水埗站换新装

作者: Timable, 2018年9月17日 (一) 下午2时30分


大家呢排去深水埗港铁站有冇发现车站内外多咗好多设计?原来港铁同萨凡纳艺术设计大学香港分校(SCAD 香港)合作,喺站内唔同位置包括车站大堂同月台展出唔同艺术品。由透明围栏、站柱以至特别订造嘅创意座位均遍布车站范围。


深水埗站月台空间重新装设咗由Boroka Kopacz同Najah Dunham设计嘅座椅「Chairs of Sham Shui Po」。座椅设计灵感源自大排档嘅凳,以唔同高度为乘客提供更灵活嘅座位选择,鼓励大众喺候车期间产生更多互动交流。至于由Nicholas Wang同Savannah Wilkins所设计嘅「Urban Identity」 图案,则系用作墙壁同隔墙装饰,旨在表达车站同社区互相连系。


有份参与今次项目并设计「Urban Identity」作品嘅SCAD香港校友Savannah Wilkins表示,对今次项目充满热诚同期待,「港铁一直是香港城市生活中不可或缺的一部分,因此我们视今次合作为将艺术带入深水埗社区日常生活的最佳机会。」

而「Chairs of Sham Shui Po」设计者之一嘅Boroka Kopacz补充:「我们很高兴看到自己的设计概念在深水埗站实现出来。早前我们于社区进行了大量研究,希望透过艺术反映深水埗生活文化。」


今次嘅合作拣咗较有香港地道风情嘅深水埗站而非较多游客嘅尖沙咀同旺角等站,相信将艺术进一步融入社区。而其实外国好多地方都会将地铁站设计到美轮美奂,吸引游客影相,成为景点之一,唔知香港港铁站会唔会做到呢?

所有图片由SCAD香港提供
文:NC