歌迷受咁耐苦,政府终于做返啲嘢,虽然迟就迟咗啲,不过总算好过冇。消息话民政事务局交文件俾立法会话近年「黄牛飞」问题越趋严重,虽然只系有部份受欢迎嘅节目先会出现问题 (系呀~有啲Show真系炒唔起㗎),但为咗回应社会诉求 (是咪要多谢你),考虑以修例同行政措施打击「炒黄牛」喎,包括建议减少内部飞认购比例、用实名制售票,同埋将红馆同伊馆呢啲热门政府场地纳入埋《公众娱乐场所条例》 (系呀~其实一楼炒红馆飞都唔犯法㗎),令到第时炒红馆犯法有阻吓性咁话喎!

民政事务局提交嘅文件中讲到,2017-18年度喺红馆嘅音乐会、栋笃笑等大型收费娱乐节目有29个 (共111场演出),分别占红馆全年所有活动约69%,而首日公开发首嘅内部飞比率就系69.6%,即系大约有3成飞比大家买。有啲绝望座位表望落去目测真系好少,有啲大Show如五月天又真系多啲飞,average返呢条数都好似make sense嘅~

文件中亦讲到,其中一个可有效打击门票炒卖嘅方法就系实名制卖飞 (哗~唔该晒喎~),但由于涉及到私隐、同操作上嘅困难,例如入场时间会较长等,康文署会同政府资讯科技总监办公室研究下点搞喎~咪先~康文署有冇见过Steve Jobs先?!

另外份件都有话红馆同伊馆嘅内部飞比例嘅上限有下调空间,但考虑到演出业有所关注,认为唔适宜立即大幅度降低内部飞比例,应该逐步下调饷比例。

而现时红馆同伊馆等康文署场地系唔受《公众娱乐场所条例》所限嘅,政府话会审慎研究一个喺法律同执行上较稳妥嘅方案,即系有机会会将红馆炒飞刑事化,吓下啲牛牛转行去耕田唔好再炒飞咁。