率先试玩: 海洋公园哈啰喂 2015

作者: Timable, 2015年9月24日 (四) 下午12时20分


还记得当天小编第一次玩Halloween, 唔是在海洋公园, 亦唔是在廸士尼, 而是在大学的Hall里。我所住的Hall, 楼高5层, 每层有唔同主题, 有中式有西式, 中式者满地溪钱, 纸扎公仔当然唔少得;西式者较为可爱, 不外乎蜘蛛、蝙蝠、南瓜等, 比较劲的是有位”败痾”系同学拿来骷髅朋一副, 算是高成本制作。

而家人大咗, 冇得喺Hall玩就要去主题公园玩啦! 两个去边个好? 相信大家都系记得罗兰姐多啲啦~ 这就是Marketing的威力! 今年系海洋公园哈啰喂15周年, 听讲有「8间鬼屋, 10种体验」, 咁多间究竟一次过玩唔玩得晒呢? 而今年嘅鬼屋又有几惊吓呢? 等小编舍身为人民, 率先试玩! (惊惊猪mode)

今年哈啰喂嘅一大重点, 就系同FOX频道全球热播《阴尸路 The Walking Dead》合作嘅「逃出阴尸路」鬼屋。套剧之前大家都应该睇过, 就算未睇过都大概估到套剧系讲啲主角们系咁跑呀跑呀跑, 又系咁杀啲丧尸, 但当然, 美剧好睇在会有好多错中复杂曲折离奇千丝万缕嘅斗智斗力, 喺睇就嚟播嘅Season 6之前, 可以率先玩呢间重现一幕幕过往几季经典恐怖场景嘅鬼屋, 又真系好刺激喎! 亲身去到诡秘嘅小镇监狱同终点站等剧集内唔同场景, 要面对啲扮得真系好恐怖加核突嘅丧尸嘅凶猛突袭, 直头好似代入咗套剧一样咁紧张!


小编同新一代人气美少女模特儿Jody 曾雨晴一齐走入呢间丧尸鬼屋, 未见丧尸已经畀阴深嘅场景同气氛吓到个心离咗几离! 突然就走咗2只好烂晒面嘅丧尸出来, 唔知典解明明知渠系假嘅, 都真系会惊! Jody惊惊猪就更好, 小编可以安慰渠一番~ 走过几个场景, 救星到喇! 原来演员们连警察都扮埋, 负责保护市民! 小编即时唔惊猪, 仲顿时感动猪! 感慨原来警察及其手臂嘅伸延唔系用来打市民架! 系用来打丧尸架! 正当小编都未感动完, 就有7个警察将只丧尸推咗埋暗角, 拳打脚踢咗成2分钟呀! 呜~ 呜~ 虽则我唔是条丧尸肚入面条尸虫, 我都戥条丧尸痛呀~ (当然, 呢幕是老作的) 好不容易, 在惊猪与感觉猪之间, 跟Jody手牵手再走过几个场景, 终于走出咗恐怖嘅丧尸鬼屋, 重见光明! Jody的手也徐徐的放开了…


===========================================
美剧迷请注意! 新一季《阴尸路 The Walking Dead》10月返黎喇!
《阴尸路The Walking Dead》 Season 6
FOX 频道 (now TV CH.518)
10月12日起 逢星期一 9pm
美国同日播出

===========================================

到了另一个今年哈啰喂嘅重头戏H15, 今年大玩感觉很邪门嘅「头七」… 由于呢间鬼屋嘅参加者系要逐个逐个玩, 所以要预先登记, 冇得walk-in架! 小编同Jody当然有得玩啦! 不过要分开玩… 小编玩先, 跟Jody生离死别, 小编跟Jody说「我走先喇…」,随即再哼多一句「♫玩游时开心一点不必挂念我~♫」Jody笑了, 小编安心上路去, 先来影张车头相, 然后入殓房自己训上灵床, 由仵作绑到实一实, 想郁都郁唔到, 老老豆豆, 真系即刻认真mode, 諗下what if自己坚系咩咗, 应该是同一个情景… 然后就开始丧礼了, 自己的车头相在灵堂上, OMG! 啋~ 然后就慢慢落地狱, 呜呀~ 好多恐怖鬼呀~ 跟住,要上court! 是地府的court! 阎罗王:「你有罪! 判落18层地狱!」我:「Objection! 我都未知咩罪!」阎:「以胸袭警系死罪!」我:「我系男人,那有胸?」阎:「根据基本法,三权唔驶分立,我地位又超然,我讲乜就乜!」我:「敢问阎生贵姓?」阎:「本官姓梁! 拉渠出去~」(当然, 呢幕是老作的, 而头一句「你有罪! 判落18层地狱!」是真的, 都几搞笑~ 阎生一脸认真, 但渠一日要讲呢句对白几百次) 就是咁, 小编就落咗地狱。但又其实, 地狱环境都几好, 起码唔驶几球嘢供间劏房都仲要畀人闹系废青吖, 仲舒服过现实嘅香港, 原来住喺香港惨过住喺地狱~ 正当榴槤忘返之际, 已经送我来回地狱又折返人间… 典解我去完地狱嘅感觉同我去完日本返嚟嘅感觉一样架?! 都系唔想返香港啰~ 正一废青! 等咗一阵, Jody都玩完出来, 一脸惊慌, 我轻抚她的脸:「你OK嘛? 对不起刚才陪不到你!」Jody:「没有你在,我也怕!」我:「别怕! 现在我不是在你身边了吗?」留意返, 突然用上书面语代表抒情文体。

(由于在H15入面是被绑实的, 因此冇得影相)

玩完H15, Jody表示是日惊吓Quota用尽, 不能再承受惊吓。那么小编当然照顾有加, 不再让Jody受惊, 就陪同渠游玩另一个重点但又完全唔惊吓嘅「多啦A梦哈啰喂影城」! 虽则Jody如此年轻, 但渠都系觉得叫叮当亲切得多! 一去到, Jody就被6位主角首度嘅哈啰喂造型所吸引, 小编变身娘娘御用摄影师, 系咁影影影! 除咗好靚嘅布景之外, 仲有啲小学鸡机关可以玩的! 其实间唔中小学鸡下都好吖, 可能因为日日睇新闻都觉得啲高官讲嘢连小学鸡嘅程度都未有, 玩吓小学鸡嘢立即感觉到一阵超然嘅优越感! 玩玩吓, Jody突然同小编讲:「同我影张相吖~」小编:「咪影紧啰~」Jody:「唔系呀~ 你过嚟影吖~ 搵人揸机吖~」



叮当都玩完, 天色已黑, Jody有点攰, 小编说:「其余的鬼屋就下一次再玩吧! 包括日间装饰细致华丽, 夜间变身鬼屋嘅「甜心萝莉大宅(日) / 血咒哥特古宅(夜)」、云集过去14年多个精选哈啰喂场景嘅「十五年惊异回魂」、需要较大体力又唔可以着短裙玩因为要系咁爬爬爬嘅「生化突变大暴走(日) / 异种突袭大屠亡(夜)」同埋全港最长嘅室外万圣节糖果游乐场地「小南瓜糖果游」等等...」Jody:「乜你背熟咗嘅? 你系海洋公关吗? (海洋公园同公关嘅混合体) 好心急呢~ 几时再嚟?」小编表示:「你想的话, 听日就同你再嚟啦~」Jody甜说: 「真系架?!」


文 / 摄: 黑莓
Model: Jody 曾雨晴
衣裳协力: Jody 渠自己啰~ 阴公猪