2018年11月23日 ‑ 12月9日 (逢星期日,四至六)



电影节详情、购票及活动报名-
⚡️第二届「沟」电影节网页
http://www.hkfcc.org/cultfilmfestival2018

「沟」前|冯庆强

问:听人讲《午夜凶铃》巧惊?!
答:惊㗎!我到依家都唔敢重睇。

问:虽然未睇过,不过我以前喺学校扮过贞子。头发梳前,遮住脸,窒下窒下咁郁。
答:可能太深入人心。当年戏院上,观众咿哗鬼叫,开Party一样。

问:其实点解拣呢套戏?
答:今次主题系录影带。贞子故事,同录影带直接有关,好贴题。

问:即系个故仔要讲录影带?
答:咁又唔一定。除咗录影带本身,亦包括八十年代兴起嘅MV热、Video Art、OVA等等。

问:咩系OVA?
答:即Original Video Animation,一种以录影带形式发行嘅原创动画片。由于直接销售,绕过咗公共广播审查,所以创作自由度好大。OVA题材可以严肃,又可以完全离经叛道,甚至有唔少作品,喺性与暴力方面,因为意识踩界,引起过争议。

问:最近,经常有人回味八十年代。你哋系咪都想怀旧一下?
答:对我嚟讲,八十年代未足够叫旧。不过,同样问题,我问过另一位节目策划David。话晒年纪差一大截,我想知渠点睇。David Whatsapp覆『其实我做呢个programme,从来无特别怀旧过,或者諗存唔存在怀旧嘅问题。我从来无觉得VHS嘅年代好过宜家。比我拣我都会拣宜家,用一晚就可以搜罗到塔可夫斯基高清1080p全集嘅日子。做呢个programme我觉得比较有意思嘅系,以一个物质、载体作为切入点,打开一个特定年代嘅风貌。我地嘅选片第一眼望落去好似唔太集中,但我自己觉得其实都reflect咗八十年代中至九十年代流行文化以至政经环境嘅多种面向。呢个我系觉得有趣的』。

问:听讲,本来唔会有第二届?
答:原本无话接住搞。斋放所谓沟片,我亦无咩兴趣。直至搵到录影带呢个Point,有可能扩充到成为主题,我先至提出,尝试再做。

问:今次多咗音乐呢部分,例如MV,点解?
答:首先,MV对视觉文化影响好大。比如米高积逊82年MV〈Thriller〉,从制作到演出,只可以用轰动嚟形容。又或者麦当娜嘅〈Material Girl〉,个MV就借用咗梦露嘅经典形象,重新包装流行音乐,成为完美商品。经过六、七十年代思潮嘅冲击同挫折,八十年代系另一番景象。83年《劲舞》(Flashdance)、84年《浑身是劲》(Footloose)、86年《壮志凌云》(Top Gun)等,都加插咗歌曲,呢部分拍摄同剪辑方法,实际上系MV嗰一套。毫无疑问,MV虽然好睇,但系视觉艺术系咪一下子完全靠拢商业呢?其实又唔系,有唔少导演,发现录影带呢个媒介,可以好自主,好玩嘢,比如Derek Jarman,渠拍嘅MV同长片,形式、内容,都好激进!

问:等于麦当娜首〈Into the Groove〉,Sonic Youth成员嘅side project就翻玩过。呢个就系八十年代其中一个面貌。
答:要补充嘅系,原本「低清游击战」裏面,有两部港产片。其中一部系黄志强导演嘅《舞厅》,另一部,就系未删剪嘅《第一类型危险》。呢两个戏,有好长时间因为种种问题而唔能够再做正式放映,只能以影带嘅形式喺坊间流传;两部电影本身同埋渠地嘅命运,都相当特别 。不过好可惜,因为成本、版权问题,最终都安排唔到放映。另外,主片单部分,中途亦要换片,但就一直决定唔到,呢个时候,David提议拣《德州风情画》、《老翻大师》两部戏。经渠一讲,我认为成个节目,因为呢个建议,概念上的确完整好多。

问:放片除咗戏院,仲有茶餐厅、观塘海滨?
答:若果配合到内容,换下放映场地,可能几好玩。特别一提,石井岳龙套《半个人》,除左多年前香港国际电影节之外,应该再无喺香港正式公映过。而且今次放映嘅会系电影嘅足本版,因此暂时嚟讲,呢场机会难逢。

问:话时话,你最想睇边套?
答:可能系《布袋澳跳掣》。裏面记录咗八十年代尾嘅香港,应该好有趣。