尋找隱身鬧市嘅綠洲——獨立書店
author: Timable, 27 May 2019 (Mon) 9:20am
香港寸金尺土，大型書店主要賣流行熱門嘅書籍，更甚賣埋文具同飲品，真正賣書嘅地方少之又少。不過沙漠中依然不缺一抹綠洲，香港依然有獨立書店專賣社會學術嘅書籍。「書搵人， 人搵書」，小T係度介紹香港數處綠洲，絕對值得一去尋愛書，以及支持一下獨立書店。
地址：九龍旺角西洋菜南街68號7字樓
開放時間：下午1 時 ‑ 下午11時
序言書室藏身係全香港最熱鬧嘅地區——旺角，主要售賣及代訂人文學科及社會科學之中英文學術書籍，包括︰文學、哲學、政治、社會學、歷史、文化研究等。一眾哲學家嘅書都係放當眼位置，就算平時銷量唔好被連鎖書店忽略嘅書籍，呢度都會有。
另外，序言都會舉辦各項文化活動，如讀書會、座談會、新書發佈會等，藉此推動閱讀風氣。有興趣嘅記得留意佢地嘅活動公佈啦！
地址：九龍油麻地眾坊街3號駿發花園H2地舖
開放時間：上午11 時半 ‑ 下午10時
KUBRICK名字借用電影大師Stanley Kubrick，佢地係多元化嘅文化聚散地，有各種出版圖書、表演藝術、閱讀分享會、合作學堂、藝術展覽等項目。鋪頭一邊作為書店販賣雜誌書籍，由文學、文化研究、社會科學、音樂攝影電影等藝術類書籍，到流行嘅時裝及文化雜誌都有。而另一邊就係咖啡店，買完書可以係度坐下，一邊歎咖啡，一邊享受書本。
特別之處係附近有電影周邊賣，包括各種電影海報及黑膠唱片，KUBRICK都不時會開辦文化活動。
地址：長沙灣道137-143長利商業大廈11/F
開放時間：星期一至五下午3 時 ‑ 下午7時；星期六、日休息
「我們賣書，我們不賣書」，小息書店理念係入嚟唔一定要買書，亦可以係休息嘅地方，好似學校小息時間咁。佢地希望以書作為媒介，推廣閱讀風氣，借此培養一種文化。雖然書店由宗教團體開辦，但佢地唔止賣宗教書籍，最流行嘅書籍都未必係度搵到，比起銷量，書店更重視質量，更甚佢地都會留出位置，放置自資出版嘅書籍，支持及幫助有夢想嘅作家。
此外，鋪面都會賣手作同公平貿易產品，可以話店裡每一處都有心思放置。同其他獨立書店唔同嘅係佢地更重視空間感，空間寬敞，玻璃窗邊擺設藤椅及枱，睇書睇到攰就望下窗外景色放鬆下。小息書店都會舉辦講座同讀書會。
地址：香港灣仔軒尼詩道365-367號富德樓14樓
開放時間：星期二至日中午 ‑ 下午7時；星期一休息
艺鵠係由資深藝術工作者馮美華籌辦，由英文ACO（Art and Culture Outreach）音譯過來。艺鵠視己為基地伸延至整個城市，策劃及展示藝術，特別係另類、實驗和非傳統嘅藝術類型，定期舉辦唔同嘅文化活動如展覽、音樂會、電影放映會、讀書會、講座、記者會等供人欣賞。繼而，當代文化現象和議題得以探研、討論，什或出版。
除咗文化活動，艺鵠都係一間獨立書店，存書來源主要係嚟自結業嘅曙光書店，加埋店主精心挑選非主流、人文理論與文化研究為主嘅書。當中仲會有簇新嘅二手書籍，以及過期雜誌，部分都係以優惠價出售。此外，佢地都會寄賣獨立藝術嘅作品。
地址：九龍旺角西洋菜街62號3樓
開放時間：上午11 時 ‑ 下午9時半
分店：銅鑼灣駱克道506號2樓
開放時間：星期日至四上午11 時 ‑ 下午10時；星期五、六及公眾假期前夕上午11 時 ‑ 下午11時
樂文書店係1984年成立，係最早引入台版書嘅香港書店。同其他獨立書店一樣，樂文書店都係有著濃厚人文氣息，小眾嘅書，例如文史哲、社會科學、教育、 心理輔導等都有機會係度搵到。另外，書店都有經常做優惠打折，書籍價錢都比較便宜，買多啲書都唔會太肉痛。
就算兩間分店係旺區位置，但店內環境安靜，一嚟係位於樓上，二嚟搵到呢處「綠洲」都係愛書之人，唔會高談闊論，而係真心去搵書享受書本。
地址：太子荔枝角道79號寶豐大樓
開放時間：下午1 時 ‑ 下午9時半
我的書房係一間二手書店，店主Daniel係80後嘅青年，用盡所有積蓄同心血開店。書店目標係好書繼續流轉，讓更多人得到閱讀嘅樂趣。比起其他書店，我的書房嘅書籍種類較多，除咗人文學科嘅書籍，都有賣工具書、百科全書、經濟學、股市投資及小量兒童書籍。
用一個字形容呢間書店就係「亂」，書籍排山落海嘅擺放，連地下都擺放一堆又一堆嘅二手書，不過店主Daniel認為「亂」就係我的書房嘅特色，而且「亂中有序」，隱藏着高度理性化嘅秩序，而秩序只有店主Daniel知道。二手書嘅特別之處莫過於發揮書本嘅目的——被閱讀，令「書搵人， 人搵書」不斷地循環，唔會淨係停留於一個讀者中。
*獨立書店嘅開放時間容易因應文化活動有所變動，所以去前最好上官網睇多次穩陣啲*
撰文：SN
圖片來源：網絡
