【彩色運動場】香港多個天台運動場 新潮打卡運動熱點

多做運動身體好，有個靚場就更加好! 疫情反覆，有時留喺屋企太耐都會想郁吓，出去伸展吓筋骨。香港近年多咗好多新興運動場，有由舊街場經過活化翻新而成嘅多用途運動場，亦有商場新增嘅戶外草地運動場。除咗運動設施之外，更加運用創意思維，將街場都設計得好有格調，有個靚場，做運動都精神啲啦!

翻新咗嘅運動場，街坊有個好地方聚腳做運動之外，都吸引咗唔少人嚟影相打卡。提提你，打卡還打卡，喺共享地方要尊重自己尊重別人，千祈唔好阻到其他人做運動呀!! 以下就介紹幾個都係位於天台嘅靚場比大家，咁啱住附近嘅你就記得去郁多啲啦! 就算唔喺街坊，香港嘅社區咁靚，經過都歡迎你去踩吓場!

---

將軍澳「明德主場」
明德商場上蓋球場 全港首個女性友善運動場


位於將軍澳嘅明德商場，民坊完成活化工程後喺2021年1月重新開放，加入咗1.5萬呎全新運動共享空間。球場設於商場停車場上蓋，以鮮豔漸變顏色設計，從唔同嘅角度睇，會見到”W”或”M”字，同時代表Women(女性)及Men(男性)，推行男女共融; 同時，都可以象徵Willpower(意志力)、Worthiness(價值)、Motivation(動力)等等。球場圍欄上面仲刻有好多具激勵性嘅字句，例如「練波辛苦 輸仲辛苦」、「完場前 永不放棄」、「完場後 不忘初心」等等，引起共鳴之餘，打波途中望到都有啲鼓勵㗎!


作為全港首個女性友善嘅運動場地，場地亦同非牟利機構Women in Sports Empowered HK (WISE HK)合作，計劃持續舉辦女性恆常訓練班，鼓勵女性持續運動。球場外都有唔少貼心設施，包括鋼面鏡比運動員喺運動前後方便整理儀容，仲增設掛袋勾方便掛隨身物品。場外一樣用咗鮮豔色彩設計嘅「Rest鬆」(Rest Zone)，有擺放輔助肌肉伸展嘅裝置，方便進行熱身拉筋及伸展放鬆運動。

地址: 將軍澳培成里10號
開放時間: 6am - 10pm

---

九龍灣「啟業運動塲」
型格設計加入香港元素 特色挑戰區活現街頭文化


位於啟業商場天台嘅啟業運動場，喺籃球街場界別一向都好受歡迎，重點喺有上蓋，就算落雨都依然可以打波。由黃色鐵欄包圍住嘅籃球場，又被稱為「黃金空中籠」，球場喺翻新後都依然保留呢個深入民心嘅特色。翻身後，場地加入特色元素，重新上漆嘅鐵籠換上更光鮮嘅黃色，場地同柱身漆上深灰色及黃色，換上透明籃板加螢光色外框，非常型格。設計者亦別有用心，加入許多香港元素，強調「敬業樂業 Never Quit」嘅香港精神，顏色使用方面，加入咗螢光效果嚟代表香港嘅本土霓虹燈，配合埋場地嘅深灰色主色，顯得格外搶眼。球場上唔同地方都噴上咗一啲打氣金句，你又搵唔搵到屬於你嘅句子呢?


設計以外，球場都變得多元化，加入唔少設施，例如「啟業穿三針」射籃挑戰區，牆上有唔同高度籃球架，地下亦畫咗唔同大小嘅圓圈，想點挑戰任你話事! 所謂街頭文化，就係要自由嘛!

籃球場以外仲有唔同運動區域，包括羽毛場以及三人足球場，圍住室內球場亦有一條緩跑徑，鍾意各種運動嘅朋友都可以有各種選擇。而室外位置亦有色彩繽紛嘅兒童天地，設有跳飛機格仔，啱哂小朋友一齊放電!

地址: 九龍灣啟業道18號啟業商場停車場天台
開放時間: 7am - 10pm

---

屯門「兆禧運動場」
多個特色運動球場 x 平衡車賽道 幽默打卡熱點


位於屯門兆禧苑停車場上蓋嘅運動場，活化之後成為咗區內獨一無二嘅多用途運動場。運動場主色為亮麗藍色，配合橙色同白色線條，形成強烈對比，鮮豔嘅顏色為社區帶嚟唔少生氣。運動場設施豐富，主要有一個全場籃球場、一個多用途球場、兩個單邊籃球場、兩條長150米嘅緩步徑、仲有特色「遊戲地景」以及「車胎地帶」。場地更加有特色賽道，可以用嚟作平衡車訓練同比賽，香港玩平衡車嘅地點唔多，呢度都喺一個唔錯嘅選擇。


除咗運動，兆禧運動場打卡都一流㗎! 場地以「笑，嘻」為主題，設計咗多個打卡位，通往球場嘅樓梯、「笑左笑右」打卡牆，都充滿幽默感。喺球場入面細心睇，仲會發現隱藏住好多笑臉，你又搵得哂嗎?

球場部分時間提供網上預約，有興趣嘅朋友記得先上民坊官網，預約你想使用嘅場地喇!

地址: 屯門湖翠路201號
開放時間: 6am - 10pm

---

屯門「愛定籃球場」
彩色屋村籃球場 大膽配色打卡-able


屯門仲有另一個色彩繽紛嘅上蓋籃球場，位於屯門友愛和安定邨的愛定商場。喺由民坊、Red Bull以及藝術企業SWL合作，將愛定籃球場重新設計，將原身普通嘅屋村籃球場搖身一變成為藝術感十足嘅運動場地，仲好啱打卡添。藝術團隊將籃球場重新塗上鮮豔色彩，用色都非常大膽，睇落相當有活力!


地址: 屯門鄉事會路2A號愛定商場上蓋
開放時間: 9am - 9pm

---

沙田新城市「躍動悠園Sportzone」
全港首個空中草地運動公園 7大戶外健身設施


喺沙田新城市廣場平台有個新嘅運動公園免費比市民享用特色健身設施，場地佔地3.5萬平方呎，有7大戶外Fitzone: 當中包括好玩又刺激嘅5米高滑草梯、17米長S型懸吊式平衡木走道、15米長攀石牆、劃分成8種唔同訓練嘅無器械健身區、特色籃球場、草地緩跑徑仲有森系小山坡及秘道打卡區。場地色彩運用豐富，設施都頗多元化，雖然唔算喺正規嘅運動場，都適合一般家庭嚟做吓簡單運動輕鬆下㗎! 場地定期都會舉辦運動課程，部分設施例如滑草梯喺需要喺商場消費先可以參加，更多詳情請留意商場公佈!

地址: 新城市廣場1期5樓平台
開放時間: 7am - 10pm

---

圖片來源: 網上
撰文: HL