深水埗近年變身文青最愛踏足之地,除咗有唔少藝文機構同活動,亦因為有唔少各具特色嘅咖啡店,最啱週末去嘆下咖啡食個下午茶。踏入2021年幾個月,再有幾間高質素Café進駐深水埗呢個文青聚腳點,以下就重點推介3間最新開,著重食物質素又有Style嘅Café比大家!!


迷你毛 | Minimal
簡約舒適環境 食物用心之作性價比高


位於鴨寮街,穿過喧鬧嘅市集,甫進入南昌街分隔開嘅另一個路段,就會見到有一間以純白外牆裝修嘅大面積咖啡店,落地大玻璃門面加上簡潔嘅裝潢座落喺舊城區中間格外顯眼。


呢間Café叫做迷你毛,但喺鋪位一啲都唔迷你㗎! 擁有2千呎大面積嘅店舖原來喺打通咗兩個鋪位,裡面多達60個座位但都依然好闊落,可以坐得輕鬆啲,同朋友傾計都好自在。一入門口有個打卡位,淺木色圓形掛牆凳配上淺粉紅色沙發,配合埋白色牆上個藤葉裝飾,帶點日系簡約風格,點影都靚! 再望入餐廳裡面,特別之處喺可以見到咖啡店清楚分為兩個部分: 一邊喺屬於少女風格嘅可愛粉紅色牆,襯以深灰色座椅同雲石枱,配埋大圓形吊燈,摩登而有格調; 另一邊喺帶有日系風味,牆身、地板以及枱凳都採用咗木色,中間有兩組茶几配寬闊矮咖啡座椅,休閒自在; 人數較多嘅朋友可以選擇窗邊有個Corner座位,可以觀賞住開揚街景,亦有自成一角嘅感覺,非常舒服。


Café提供西式食品,有多士、意粉、窩夫等等,小T真實食評覺得炸雞窩夫非常出色!!用水果醃製過夜嘅炸雞食落Juicy而唔油膩,夾埋用自家製粉漿嘅窩夫再淋上楓糖漿,咸甜適中清新香口,喺Encore之選!!另外都有唔同嘅多士亦喺店舖主打食品,例如松露水波蛋什菌多士,滿滿黑松露配流心蛋,亦用咗比較健康嘅麥包作多士。其他選擇有牛肝菌孖瓣粉、芫茜苗香辣大蝦扁意粉、辣手撕豬肉窩夫、牛油果巴馬火腿多士等等,份量適中,適合幾個朋友叫多幾款一齊Share。

飲品方面咖啡以外亦有幾款特色飲料,例如雪糕波子汽水、火龍果乳酪、蝶豆花柚子梳打等等,賣相好靚,味道亦好清新開胃。


食完主食當然要滿足埋第二個胃啦! 呢度嘅甜品從外型到味道都好吸引! 必試嘅有意大利芝士蛋糕(Tiramisu)同薄脆拿破崙: Tiramisu外型好似一個鬆軟嘅雲朵,面層嘅cream cheese綿滑,中間餅底有酒香但唔會過濃,再灑上脆脆、谷古粉混合朱古力粉,口感唔錯亦唔涸喉; 另一個大推甜品就係薄脆拿破崙,唔同傳統嘅拿破崙,用咗幾層薄脆整成,鬆脆口感配合中間榛子醬夾吉士醬,味道豐富!! 另外,面層炒得好脆嘅果仁,同埋配襯嘅雪糕都相當有驚喜,雪糕上面仲有啲爆炸糖,口感好得意!!

整體甜品唔會過甜,食完全份都唔覺膩,啱哂時下女仔比較注重健康同鍾意適中嘅味道。如果你想揀一間食物質素高而又可以打卡嘅,都幾推薦你去試下!

營業時間: 星期一至日 11am - 9pm
地點: 深水埗鴨寮街121-123號地舖


Loop Kulture
Café x 有機產品小店 鬧市中的小森林

圖片: Instagram @szebebebebe

另一間位於鴨寮街嘅有剛開業嘅Loop Kulture,喺有兩層高嘅Café,樓底相當高空間感唔錯。水泥牆配木傢俬,帶點輕工業風嘅型格裝修,而且店內放置咗好多植物,好似走咗入森林咁,超多打卡位!! 呢度仲喺寵物友善㗎,可以帶埋你嘅毛孩過嚟呢個鬧市中嘅小森林,chill返一個下晝!!

圖片: Instagram @slow_d.o.w.n

店鋪入面仲有一個部分有賣有機產品,推廣健康生活,產品種類例如日用品、堅果、各種食品同醬料等等。

圖片: Instagram @meals.projects

食物方面,選擇唔算多但都喺用心之作,主要提供輕食,造型出色而且都係比較健康清新,主打有彩虹乳酪碗、牛油果無花果配酸種麵包等等,仲有大熱嘅焦糖香蕉法式吐司,賣相擺盤已經非常打卡-able,厚多士嘅脆焦面加埋焦糖香蕉同雪糕,見到已經流口水!

營業時間: 星期一至日 10am - 6pm
地點: 深水埗鴨寮街90號地下


楓子珈琲 | Fonji Cafe
復古日系風格 每日限量天使之鈴可麗露

圖片: Instagram @fonji.cafe

呢間位於楓樹街嘅楓子珈琲,見到鋪面裝修同店名都感受到濃濃嘅日式風味。木系裝潢配深色牆,店內仲有唔少店主收藏嘅小物同懷舊裝飾,走入店內除咗咖啡香,仲會有股濃濃嘅日系復古味,打卡位都幾多。楓子珈琲只喺開業短短一個月已經大受歡迎,每逢週末都見排隊人龍,絕對喺今期最紅!!

店鋪位置關係,裝飾都加入咗唔少楓樹元素,連咖啡都有一款加入咗楓糖嘅Fonji maple cafe latte可以選擇,相當用心。食物方面提主要供日式輕食,選材都頗特別,有多種吐司,特色主食有楓糖芥末薯粒幾塊意粉、櫻花蝦豆乳擔擔讚岐湯烏冬等等,味道清新。

圖片: Instagram @fonji.cafe

而甜點喺呢度極受歡迎嘅產品,蛋糕亦會不定期推出限定款色。甜品款色方面頗多,例如有軟熟嘅戚風蛋糕、賣相超少女嘅煉乳草莓蛋糕、大熱櫻花豆腐芝士蛋糕等等,味道清新而唔會太甜。

另外楓子珈琲非常有名氣嘅,喺每日限量出爐,只造一批嘅天使之鈴可麗露,大約下午1點左右出爐,焦糖香氣十足,如果你遇上出爐時間,可以一試!
*實際出爐時間以店內公佈為準

營業時間: 星期二至日 12nn - 7pm | 星期一全日休息
地點: 楓樹街5號


撰文: HL