YouTube video


日清食品「合味道紀念館香港」已經正式開幕喇!!唔少香港人去日本旅行都有去過呢個紀念館,依家喺香港都可以玩到喇! 合味道紀念館選址尖沙咀中港城,總共有三大好玩工作坊,除咗有大家熟悉嘅兩個熱門工作坊: 「我的合味道工作坊」以及「出前一丁工作坊」之外,紀念館仲帶嚟咗全球獨家限定「榖物麥片工作坊」,製作屬於你獨一無二嘅日清人氣產品! 除咗工作坊,仲有三大打卡位,日清粉絲們千祈唔好錯過喇!

三大人氣工作坊:
我的合味道工作坊


發揮你嘅小宇宙,設計出你獨有嘅合味道杯麵! 參加者可以喺杯麵包裝上面畫上你鍾意嘅圖案,然後自己選配料,再拎去做密封包裝,就完成你嘅尊屬口味杯麵喇!


我的合味道工作坊
票價: $60 | 工作坊時間: 30分鐘
3歲以下並不佔座位幼童,可在成年人陪同下免費入場。


出前一丁工作坊


平時3分鐘可以煮好嘅一碗出前一丁公仔麵,到底親手由麵團開始製作又需要幾耐呢? 喺出前一丁工作坊,聽完講解員介紹出前一丁由來,你就可以一嘗製麵過程,參加者可以親自體驗搓麵團、切麵過程,利用「瞬間熱油乾燥法」炸乾麵團,最後當然唔少得嘅就喺設計包裝啦!


製作過程中,參加者仲要戴上出前一丁頭巾同埋圍裙,造型滿分! 而頭巾最後仲可以變成便當巾,包住你嘅出前一丁製成品成為一個便當帶走添!

出前一丁工作坊
票價: $120 | 工作坊時間: 90分鐘
參加者的最低身高要求為110厘米。活動須分組進行,參加「出前一丁工作坊」的訪客必須購買雙數數量的門票。
*此工作坊將於4月中正式開放。最新詳情會定期於官方網站公佈。


穀物麥片工作坊


全球獨家限定嘅穀物麥片工作坊,率先嚟到香港! 參加者一開始透過互動投影裝置嘅小遊戲,可以了解到呢個新產品誕生的緣由及製作過程,畫面得意可愛,啱哂一家大小一齊玩! 玩完之後就可以製作你嘅穀物麥片,設計好包裝之後,就可以選擇你喜愛嘅食材配料,有好多種水果乾等等,睇落好好食啊!!


穀物麥片工作坊
票價:$60 | 工作坊時間: 30分鐘
參加者須年滿3歲。

玩完哂工作坊之後,當然唔可以錯過館內多個打卡位啦!!


三大打卡位:
3米高「大杯麵」


必影打卡位!!好大個杯麵超可愛!!但喺點解倒轉咗? 原來喺用嚟致敬安藤百福先生嘅「逆向思維」概念,多得呢個想法突破既有思考框架,杯麵才得以大量生產㗎!

日清漫畫牆


入場之後,會見到一幅有關安藤百福創造力之旅嘅歷史時間線牆,由即食麵、杯麵嘅生產契機,到現時嘅太空杯麵都有介紹,背後有好多得意趣聞!! 而喺時間線後面,就有一幅日清漫畫牆,用漫畫風格介紹館內三個工作坊,啱哂打卡到此一遊!!

杯麵牆


入場位置仲有另一個打卡位,就喺呢個震撼杯麵牆喇!!牆上面除咗有大型杯麵嘅切面之外,仲有嚟自世界各地嘅熱門口味杯麵! 快啲搵吓有冇你嘅最愛喺裡面?

仲未夠喉? 臨走前去埋合味道紀念館紀念品店,選購埋紀念品,就完滿結束今次旅程喇! 紀念品店入面除咗有各種特色產品,仲有香港獨家杯麵組合連紀念品,而且更會展示出唔少經典紀念品,有金杯麵、懷舊裝置等等。精品店位置喺免費入場㗎,大家都可以去睇吓有冇心水產品啦!!


合味道紀念館香港
地址: 尖沙咀中港城2樓26-35號
開放時間:
逢星期一、二、四、日 11:15am - 8:15pm
逢星期五、六及公眾假期 11:15am - 9:15pm
逢星期三 休館

票務詳情:
訪客請提前於網上預約參加工作坊: http://www.cupnoodles-museum.com.hk
*紀念品店免費入場。


撰文: HL