等咗咁耐,終於到夏天喇!可以盡情同陽光玩遊戲!但係去邊度好呢?去沙灘?怕晒黑喎!去行山,我怕會中暑喎!點樣可以玩得夠舒服,有文青feel,又呃到like,仲可以食好西呢?小編今次介紹大家去西九文化區嘅藝術公園,呢度除咗有無敵大海景同一大片綠悠悠嘅草地之外,仲可以滿足晒以上咁多個願望!


第一個打卡景點就係藝術家同平面設計師Calvin Ho 喺自由空間留白Live House外牆嘅《Ensemble II》壁畫喇! Calvin亦用咗壁畫上鬼馬生動嘅角色設計咗一系列嘅Facebook同 IG filter,咁樣打卡就更多like啦!

下載Facebook及IG filter: https://wk.org.hk/3hBxJPo


一路沿海邊行,行到有少少攰,最啱就係嚟呢度遮下陰抖下涼。呢個係西九比賽展亭「Growing Up」,好有特色!不論自己喺度吹下海風,或者約班朋友嚟呢度傾計,睇下日落都幾爽喎!


嚟到西九又點可以錯過吸收文化氣息嘅機會!充滿文藝復古感嘅音樂三輪車遊走海濱長廊,為大家帶嚟動人音樂,點綴悠閒週末。藝術家張瑋晉利用循環再造材料,設計別具本地情懷色彩嘅三輪車,上面更載有1960年代香港製造嘅曾福琴行摩利臣牌古董鋼琴。
醉人黃昏下聽住浪漫嘅爵士樂,真係好Chill呀~到時大家仲可以喺社交媒體上Tag #CyclingPiano #音樂三輪車,同朋友Share呢個與眾不同嘅免費音樂會!

日期:8月7日起逢星期六及日
時間:下午5時30分至6時30分
地點:藝術公園及海濱長廊
即刻上 https://wk.org.hk/3yuU7jh ,睇吓有咩表演嘉賓先!



就喺自由空間嘅留白Live House,每逢週末都會有「自由空間音樂擊」Live表演,唔好錯過,今個星期有邊個音樂單位表演?即上 https://www.facebook.com/groups/freespaceweeklygigs



喺壁畫打完卡,又行完海邊,有啲餓添,係時候食好西!西九呢度有咁多間特色餐廳,食正餐、輕食或者飲返杯都得,最重要係可以叫外賣,坐喺呢片草地上面chill住嘆,仲可以免費借用沙灘椅,吹住海風,嘆下美食,人生一樂也!

多間海旁餐廳及輕食店:
https://wk.org.hk/2UHUcRQ


大家不妨租用埋「悠遊西九」單車,踩住佢喺藝術公園四圍去,寫意得嚟又唔怕腳仔軟!


玩咗大半日,個個願望都滿足晒,仲可以欣賞埋日落!但係又唔駛依依不捨嘅,下個星期再嚟過咪得囉!西九文化區嘅藝術公園,日日都開放,等住你嚟玩!

前往方法:
1. 九龍站E4或E5出口,步行約10分鐘
2. 於九龍站乘搭 26/74小巴直達
3. 設有F區、E區停車場 (消費滿$200可享免費泊車優惠)
https://wk.org.hk/2U4TFcU

PS. 訪客請保持社交距離並遵守羣組聚集之措施